قاسىم-جومارت توقايەۆ اقوردادا «قازترانسگاز» اكسيونەرلىك قوعامىنىڭ باسقارما توراعاسىمەن كەزدەستى. قايرات شارىپبايەۆ ۇلتىق گاز وپەراتورىنىڭ جەتىستىكتەرى مەن سالاداعى نەگىزگى پروبلەمالارعا مەملەكەت باسشىسىنىڭ نازارىن اۋداردى، دەپ جازادى baq.kz.

پرەزيدەنت «قازترانسگاز» اق كومپانيالار توبىنىڭ بيىلعى سەگىز ايداعى وندىرىستىك جانە قارجىلىق كورسەتكىشتەرىمەن تانىستى.

قايرات شارىپبايەۆتىڭ ايتۋىنشا، ماگيسترالدىق تاسىمالداۋ وتكەن جىلمەن سالىستىرعاندا 14% ءوسىپ، 65،4 ملرد م3 قۇرادى.

وسى كەزەڭدە وتكىزىلگەن گاز كولەمى 14،4 ملرد م3 جەتتى، ءبىراق ىشكى تۇتىنۋدىڭ وسۋىنە بايلانىستى گاز ەكسپورتى 20%-عا قىسقارىپ، 4،3 ملرد م3 قۇرادى. ىشكى نارىققا گاز جەتكىزۋ 14% ۇلعايىپ، 10،1 ملرد م3 بولدى.

قارجىلىق كورسەتكىشتەر بويىنشا ۇلتتىق وپەراتوردىڭ تابىسى 8 ايدا 6% ءوسىپ، 1،342 ترلن تەڭگەنى قۇرادى، ال تازا پايدا 55%-عا ءوسىپ، 304 ملرد تەڭگەنى قۇرادى. الەۋمەتتىك جاۋاپكەرشىلىگى جوعارى كومپانيا رەتىندە «قازترانسگاز» اق ىشكى نارىققا گازدى وزىندىك قۇنىنان تومەن باعاعا جەتكىزە وتىرىپ، وتاندىق تۇتىنۋشىلاردى سۋبسيديالاۋىن جالعاستىرۋدا. 2021 جىلى ىشكى نارىققا گاز وتكىزۋدەن كەلەتىن شىعىندار 158،8 ملرد تەڭگە بولماق.

بيىلعى 31 تامىزداعى جاعداي بويىنشا بيۋدجەتكە سالىق جانە باسقا دا تولەمدەر رەتىندە 128،4 ملرد تەڭگە اۋدارىلدى. كومپانيانىڭ بارلىق تابىسى وتاندىق گاز تاسىمالداۋ جۇيەسىن قالىپتى جاعدايدا ۇستاۋعا جانە بورىشتىق جۇكتەمەسىن ازايتۋعا باعىتتالادى. سەگىز اي ىشىندە «قازترانسگاز» اق كومپانيالار توبىنداعى وزگە دە كاسىپورىنداردى قوسقاندا 995 ملن دولاردىڭ كرەديتتىك قارىزى وتەلدى. جالپى 2014-2021 جىلدار ارالىعىندا قتگ كومپانيالار توبىنىڭ بورىشتىق جۇكتەمەسى 9،2 ملرد دوللارعا ازايدى.

كەزدەسۋ بارىسىندا گاز تاسىمالداۋ ينفراقۇرىلىمىن جاڭعىرتۋ جانە دامىتۋ جوبالارىنا ەرەكشە نازار اۋدارىلدى. بۇعان ءبىرىنشى كەزەكتە قولدانىستاعى «ماقات-سولتۇستىك كاۆكاز» ماگيسترالدىق گاز قۇبىرىنا قاتارلاس جاڭا گاز قۇبىرىن (لۋپينگ) سالۋ، «بەينەۋ-جاڭاوزەن» ماگيسترالدىق گاز قۇبىرىنىڭ 2-جەلىسىن سالۋ جانە ماڭعىستاۋ وبلىسىنىڭ گاز تاسىمالداۋ جۇيەسىن قايتا جاڭارتۋ، ماڭعىستاۋ وبلىسىنىڭ اقتاۋ قالاسىنداعى «سارشا» مەكەنى جانە «جىلى جاعاجاي» كۋرورتتىق ايماعىن گازداندىرۋ جاتادى. بۇل جوبالار بويىنشا جوبالىق-سمەتالىق قۇجاتتاما ازىرلەندى.

بۇل جوبالاردى ىسكە اسىرۋ ءۇشىن الدا جوسپارلانعان IPO ناتيجەسىندە تارتىلاتىن «قازترانسگاز» اق جەكە قاراجاتى دا جۇمسالماق.

مەملەكەت باسشىسىنا گاز سالاسىنىڭ الەۋەتتى جوبالارى دا تانىستىرىلدى. ولاردىڭ ىشىندە قازىرگى ۋاقىتتا مۇمكىندىگى تولىق پايدالانىلىپ وتىرعان «بەينەۋ-بوزوي-شىمكەنت» ماگيسترالدىق گاز قۇبىرىنىڭ ەكىنشى جەلىسىن سالۋ جوسپارى دا بار. بۇل جوبانىڭ ناقتى قاشان جۇزەگە اساتىنى بەيمالىم.

كەزدەسۋ بارىسىندا رەسۋرستىق بازانى ارتتىرۋ بويىنشا جوبالار ۇسىنىلدى. بۇل قاشاعانداعى گاز وڭدەۋ زاۋىتتارىن سالۋ جانە جاڭا كەن ورىندارىن ىسكە قوسۋ ەسەبىنەن گاز ءوندىرۋدى ۇلعايتۋ.

«قازترانسگاز» اق باسقارما ءتوراعاسى ۇلتتىق وپەراتور كومپانيالارى توبىن سيفرلاندىرۋ جونىندەگى جوبالار تۋرالى دا باياندادى. گاز تاسىمالداۋ جۇيەسى نىساندارىنىڭ سيفرلىق كارتاسىن جاساۋ بويىنشا جۇمىستار جالعاسۋدا. بۇگىنگى كۇنى 2 ملن ابونەنت، 19 مىڭ كم گاز قۇبىرى، 22 كومپرەسسورلىق ستانسيا "سيفرلاندىرىلدى". 2023 جىلعا دەيىن تاعى 47 مىڭ كم. تاراتۋ جەلىسىن «سيفرلاۋ» جوسپارلانىپ وتىر. بۇل دەرەكتەردى تالداۋ ارقىلى تەحنيكالىق قىزمەت كورسەتۋ مەن جوندەۋ شىعىندارىن باقىلاۋعا مۇمكىندىك تۋادى.

كەزدەسۋ سوڭىندا gرەزيدەنت ودان ءارى ىسكە اسىرۋعا قاتىستى ءبىرقاتار مىندەت قويدى.