شىمكەنت قالاسىنداعى №1 كلينيكالىق اۋرۋحانادا 2014 جىلدان بەرى ترانسپلانتاسيا جاسالىپ كەلەدى. بۇگىنگە دەيىن ەمدەۋ ورتالىعىنىڭ بىلىكتى دارىگەرلەرى 172 بۇيرەك جانە 24 باۋىر الماستىرۋ وتاسىن جاساعان. 2019 جىلى ا.دونباي باستاعان كلينيكالىق اۋرۋحانانىڭ ترانسپلانتولوگ دارىگەرلەرى باۋىر ترانسپلانتاسياسى وتاسىن 5 ساعات 48 مينۋتتا جاساپ، قازاقستاندىق رەكوردتى جاڭارتقان بولاتىن.

تاۋلىك بويى جۇمىس ىستەيتىن اۋرۋحانا 520 توسەك ورىنعا ەسەپتەلگەن. بۇدان باسقا، شىلدە ايىنان باستاپ اۋرۋحانا بازاسىندا 170 ورىنعا ارنالعان ينفەكسيالىق ستاسيونار اشىلعان.

بۇگىندە مۇنداعى قابىلداۋ بولىمىنە كۇندەلىكتى 350-دەن اسا ناۋقاس مەديسينالىق كومەككە جۇگىنەدى ەكەن. ال، كۇتۋ زالىنداعى ناۋقاستىڭ تۋىستارى كامەرا ارقىلى قابىلداۋ بولىمىندەگى ناۋقاستىڭ جاعدايىن باقىلاي الادى.

جالپى اۋرۋحانادا حيرۋرگيالىق، نەيروحيرۋرگيا، ۋرولوگيا، وتولورينگولوگيا سىندى 22 بولىمشە مەن ينسۋلت ورتالىعى، كت، مرت جانە انگيوگروف كابينەتتەرى بار.

بۇگىنگى تاڭدا اۋرۋحانا قىزمەتكەرلەرى 2019 جىلدىڭ II توقسانىندا ىسكە قوسىلعان «DamuMed» اقپاراتتىق جۇيەسىمەن جۇمىس ىستەۋدە. كومپيۋتەرلەر سانى-299، پلانشەتتەر-10.