ءبىلىم جانە عىلىم مينيسترلىگى جوعارى وقۋ ورىندارى وقىتۋشىلارىنىڭ جالاقىسى 2021 جىلدىڭ قىركۇيەگىنەن باستاپ وسكەنىن حابارلادى.

مينيسترلىكتىڭ مالىمەتىنە سۇيەنسەك، ەندى ۋنيۆەرسيتەت وقىتۋشىلارى ايىنا كەمىندە 200 مىڭ تەڭگە الاتىن بولادى. اعا وقىتۋشى كەمىندە 230 مىڭ تەڭگە، قاۋىمداستىرىلعان پروفەسسور – 260 مىڭ تەڭگە، پروفەسسور – 350 مىڭ تەڭگە (ۇلتتىق جوعارى وقۋ ورىندارىندا – 400 مىڭ تەڭگە) الادى.

– توقايەۆتىڭ قولداۋىنىڭ ارقاسىندا مينيسترلىك جوعارى وقۋ ورىندارىنىڭ شتاتتىق قىزمەتكەرلەرىنە مينيمالدىق جالاقى بەلگىلەۋ تۋرالى بۇيرىق قابىلدادى. ءبىلىم جانە عىلىم مينيسترلىگىنە باعىنىشتى جوو وقىتۋشىلارىنىڭ جالاقىسى ارتتى. سونداي-اق ءبىر ستاۆكانىڭ ماكسيمالدى كولەمى ەندى ءبىر وقۋ جىلىندا 680 ساعاتتان اسپايدى. ياعني، وقۋ جۇكتەمەسى تومەندەتىلەدى. وزگەرىس پروفەسسورلىق-وقىتۋشىلىق قۇرامنىڭ عىلىمي قىزمەتپەن اينالىسۋى ءۇشىن مۇمكىندىك پەن ۋاقىتتىڭ كوبىرەك بولۋىن كوزدەيدى، – دەدى ءبىلىم جانە عىلىم ۆيسە-مينيسترى قۋانىش ەرعالييەۆ.

ەسكە سالا كەتەيىك، بۇعان دەيىن ۇلتتىق قوعامدىق سەنىم كەڭەسىنىڭ وتىرىسىندا پرەزيدەنت جوو وقىتۋشىلارىنىڭ جالاقىسىن كوتەرۋدى تاپسىرعان بولاتىن.

2019 جىلدىڭ قىركۇيەگىندە جوو پروفەسسور-وقىتۋشىلار قۇرامىنىڭ ەڭبەكاقىسى 20%-عا، 2020 جىلعى قىركۇيەكتە تاعى دا 20%-عا ۇلعايتىلدى. جالاقىنى ەداۋىر ارتتىرۋ بارىسىندا ونىڭ مينيمالدىق مولشەرى جانە پەداگوگيكالىق جۇكتەمەنىڭ ماكسيمالدى كولەمى بەلگىلەندى.