الماتى قالاسىنداعى "ماما ي مالىش" مەديسينالىق ورتالىعىندا 20 كۇننەن بەرى ەم الىپ جۇرگەن كۇلزاپيا التەيەۆا ەسىمدى 63 جاستاعى زەينەتكەر دارىگەرلەر قولىنان قايتىس بولدى. بۇل جاعدايدان كەيىن مارقۇمنىڭ تۋىستارى "قامشى" رەداكسياسىنا حابارلاسىپ، جۇمباق ولىمگە كىنالىلەردىڭ ءتيىستى جازا الۋلارىن تالاپ ەتۋدە.

مارقۇم وڭتۇستىك قازاقستان وبلىسى تۇلكىباس اۋدانىنان ارنايى ەم الۋ ءۇشىن الماتىعا كەلگەن. جەكەمەنشىك اۋرۋحانادا ەمدەلىپ جۇرگەنىنە 20 كۇندەي بولىپتى. قىركۇيەكتىڭ 20-سى كۇنى ادەتتەگىدەي ءوز اياعىمەن ەم قابىلداۋعا بارعان پاسيەنت كلينيكادا كوز جۇمعان. 

– قايتىس بولعان كىسى مەنىڭ قۇداعيىم بولىپ كەلەدى. وسىدان ءبىراز ۋاقىت بۇرىن بالالارىنا دەنساۋلىعى سىر بەرىپ، اۋىرىپ جۇرگەنىن ايتقان. كەيىن ۇلى مەن كەلىنى اناسىن الماتىداعى "ماما ي مالىش" دەگەن جەكەمەنشىك ەمحانالاردىڭ بىرىنە ورنالاستىرعان، – دەدى راحيا اۋەزحان قىزى. 

راحيانىڭ ايتۋىنشا مارقۇم كۇندەلىكتى سيستەمالارىن الىپ ەمحاناعا ءوزى قاتىناپ جۇرگەندىكتەن جاعدايى دا ءبىرقالىپتى بولعان.

– جەكەمەنشىك ەمحانانىڭ ءبىر قىزمەتكەرى قۇداعيىمنىڭ دەنەسىن كولىكتىڭ ارتىنا جاتقىزىپ، ۇستىنە اق شۇبەرەك جاۋىپ: "انالارىڭ قايتىس بولدى" دەپ الىپ كەلگەن. ءتىپتى بالالارىنا اناسىنىڭ قايتىس بولعانىن حابارلاپ ايتپاعان. تەك جەڭىل كولىكپەن ءۇيىنىڭ الدىنا سۇيەگىن كوتەرىپ، جەتىپ كەلگەن. بالالارى كولىكتىڭ ارتىنداعى ءمايىتتى كورىپ، شوشىپ كەتتى. بەتى-اۋزى كوگەرىپ، قىزارىپ كەتكەن. سۇمدىق ەمەس پە؟! جۇمباق ءولىمنىڭ ارتىندا ءبىر شيكىلىكتىڭ بارى انىق. ويلاپ قاراساڭىز كەز-كەلگەن مەديسينالىق مەكەمەدە ادام قايتىس بولعاننان كەيىن اۋەلى جاقىندارىن شاقىرتىپ، ەستىرتەدى، – دەدى ول.

كۇلزاپيا التەيەۆانىڭ تۋىستارى مارقۇمنىڭ قانداي دياگنوزبەن قايتىس بولعانىن ءالى كۇنگە دەيىن تۇسىنە الماي وتىر. دارىگەرلەردىڭ ايتۋىنشا، التاەيەۆانىڭ جاعدايى الدىندا "ناشارلاپ جۇرگەن ەدى" دەپ تۇسىندىرگەن. الايدا مارقۇمنىڭ تۋىستارى مۇنى جوققا شىعارىپ، سەنبەيتىنىن ايتتى.

– ءمايىتتى الىپ كەلگەننەن كەيىن ءبىز ونى ۇيگە كىرگىزبەدىك. ويتكەنى ءىستىڭ قالاي ورىن العانىن تۇسىنبەگەندىكتەن تيىسپەدىك. سودان مارقۇمنىڭ جاقىندارى بىردەن پوليسيا شاقىرىپ، ءىستى تىركەتكەن. ويتكەنى، قايتىس بولعان كىسىنىڭ دەنەسىندە كوگەرگەن ىزدەر بار. ءبىز ەندى عانا مارقۇمدى جەر قوينىنا تاپسىرعاندىقتان، بۇل ىسكە ءالى تولىقتاي كىرىسپەدىك، – دەدى مارقۇمنىڭ قۇداعيى راحيا اۋەزحان قىزى.

"قامشى" رەداكسياسى "ماما ي مالىش" مەديسينالىق ورتالىعىنا حابارلاسىپ، اتالعان ءىس بويىنشا تۇسىنىكتەمە الماق بولدى. الايدا ورتالىق تەلەفون تۇتقاسىن كوتەرمەدى.