قازاقستاندىق "RESELF" IT كومپانياسىنىڭ ديرەكتورى جانسەرىك تولەگەن جانە "QMED" ۇلتتىق يننوۆاسيالىق مەديسينا پالاتاسىنىڭ باسشىسى اكىم تۇرسىن رەسەي ءوزى قولدانباعان پلاتفورمانى قازاقستاندا سىناماق ەكەنىن جەتكىزدى. بۇل تۋرالى ولار جۋرناليست نارتاي ارالبايدىڭ Youtube ارناسىنا بەرگەن سۇحباتىندا ايتتى.

جانسەرىك تولەگەن مەن اكىم تۇرسىن جارتى ميلليارد دوللار جۇمسالاتىن جوبانىڭ كوڭىل كونشىتەرلىكتەي ەمەس ەكەنىن ايتتى.

جۋرناليست نارتاي ارالباي "ەگوۆ-تى سبەر-گە اۋىستىرۋ قوعامدا قاتتى تالقىلانىپ جاتىر. وعان قازاقستاننىڭ بيۋدجەتىنەن جۇمسالاتىن 500 ميلليون $ اقىلعا تومپاق دۇنيە. سونشا قارجى جۇمساپ رەسەيدىڭ پلاتفورماسىن ەنگىزەتىندەي باسىمىزعا نە كۇن تۋدى؟ مۇنىڭ استارىندا قانداي ءقاۋىپ بار؟ قازاقستان IT مامان جوق پا؟ زاڭدى سۇراقتار. ءبىر عانا ماسقارانى ايتايىق، سبەر-دى رەسەيدىڭ ءوزى ءالى قولدانباعان. دەمەك، قازاقستان ولار ءۇشىن سىناق الاڭى سەكىلدى. تەست رەتىندە كورەدى، ءبىزدىڭ ەلدە كەمشىلىك كەتسە ءوز ەلدەرىنە ەنگىزبەس بۇرىن سونى جوندەپ الادى. ال ءبىز ولاردىڭ شيكى پلاتفورماسىنا بۇكىل حالقىمىزدىڭ جەكە مالىمەتىن جۇكتەمەكپىز. ول ءۇشىن بيۋدجەتىمىزدەن 500 ميلليون $ تولەنبەك" دەپ جازدى ءوزىنىڭ Youtube ارناسىندا. 

ءجۋرناليستىڭ "راسىمەن باعدات مۋسين ءبىزدىڭ جەكە مالىمەتتەرىمىزدى ورىستاردىڭ قولىنا بەرىپ جاتىر ما؟" دەگەن ساۋالىنا جانسەرىك  مالىمەتتەردىڭ ولارعا بەرىلمەيتىنىن ايتتى، الايدا "باعدات ءمۋسيننىڭ ءسوزى بويىنشا، ءبىز تەك عانا تەحنولوگياسىن الامىز. ارينە ول تەحنولوگيانى الىپ كەلىپ، ونى ءبىزدىڭ ماماندار قىسقا ۋاقىتتا الىپ كەتە الا ما، الماي ما؟ ول بولەك اڭگىمە. ەگەر رەسەيلىك ماماندار كەلىپ ءبىزدىڭ اقپاراتتارمەن جۇمىس ىستەسە، ايىرماشىلىق جوق سياقتى" دەدى. 

مامان پلاتفورمانىڭ دوكۋمەنتاسياسىن قاراپ، زەرتتەگەنىن ايتىپ، "سونداي 150 ملن دوللار جۇمسايمىز دەپ وتىرعان ۇلكەن پلاتفورمانىڭ بار جوعى 210 بەتتىك دوكۋمەنتاسياسى بار. ول وتە از. ودان كەيىن ول ءبىرىنشى ۆەرسياسى. وعان قوسا، ول وزدەرىندە جاسالماعان. ال، ءبىز سونى الايىق دەپ وتىرمىز" دەيدى. 

ايتا كەتەيىك، بۇعان دەيىن چەحيا مەملەكەتىندە دە قازاقستانداعى سياقتى داۋ تۋدىرعان IT جوبا تۋرالى حابارلاعان بولاتىنبىز. چەحيانىڭ بۇرىنعى ترانسپورت ءمينيسترىنىڭ ميلليونداعان ەۋروعا باعالاعان IT جوباسىنىڭ وتە قىمبات ەكەنىن ايتىپ، قارسى شىقققان 60 پروگرامميستىڭ جوبانى تەگىن ىستەگەنى، ءمينيستردىڭ وتستاۆكاعا كەتكەنى تۋرالى حابارلانعان.