قىتايدىڭ اسكەري كۇشتەرى وسى اپتادا ەلدەگى ەڭ ءىرى اۋە شوۋ وتكىزىپ، ەڭ وزىق قارۋ-جاراقتارىن كورسەتپەك. بۇل تۋرالى ءال-جازيرا تەلەارناسى حابارلادى.
"Airshow China" اسكەري شوۋى پاندەميا سالدارىنان ءبىر جىلعا كەشىكتىرىلگەن. ەندى ول سەيسەنبىدە قىتايدىڭ چجۋحاي قالاسىندا اشىلادى.
قىتايدىڭ مەملەكەتتىك "Global Times" گازەتى اۋە كۇشتەرىنىڭ ەڭ وزىق يسترەبيتەلى "J-20" قاتىساتىن "تاڭعاجايىپ ۇشۋلار" بولاتىنىن حابارلادى.
"J-16D" ەلەكتروندى سوعىس ۇشاقتارىن، "WZ-7" جوعارى بيىكتىككە ۇشاتىن دروندى جانە "WZ-8" جوعارى جىلدامدىقتاعى دروندى قوسا العاندا، باسقا دا جەتىلدىرىلگەن ۇشاقتار ءبىرىنشى رەت اشىق كورمە الاڭىندا كورسەتىلەتىنى ايتىلدى.
بۇل اسكەري شوۋ تىنىق مۇحيتى ايماعىنداعى ستراتەگيالىق باسەكەلەستىك كۇشەيىپ جاتقان كەزدە وتكىزىلمەك.
جاقىندا امەريكا قۇراما شتاتتارى، ۇلىبريتانيا جانە اۆستراليا ءۇش جاقتى "Aukus" قاۋىپسىزدىك كەلىسىمىن جاريالادى. كەلىسىم بويىنشا، اۆسترالياعا اتومدىق سۇڭگۋىر كەمەلەرى بەرىلەدى. بۇل كەلىسىم اۆستراليانى الەم بويىنشا اتومدىق سۇڭگۋىر كەمەلەرى بار جەتىنشى ەلگە اينالدىرادى.
"Aukus" كەلىسىمىنە سايكەس، وداقتاستار كيبەر مۇمكىندىكتەرىن، جاساندى ينتەللەكت جانە باسقا دا تەڭىز استى تەحنولوگيالارىن ءوزارا بولىسەدى. كەلىسىمگە قول قويىلعاننان كەيىن قىتايدىڭ مەملەكەتتىك گازەتى اۆستراليا بەيجىڭنىڭ يادرولىق سوققىسىنىڭ نىساناسىنا اينالۋى مۇمكىن ەكەنىن مالىمدەگەن.
ال وتكەن جۇمادا اقش، اۆستراليا، جاپونيا جانە ءۇندىستاندى قامتىعان تورتتىك ەلدەرى باسشىلارى اق ۇيدە جەكە كەزدەستى.
تورتتىكتىڭ كەزدەسۋى داۋلى وڭتۇستىك جۇڭگو تەڭىزى مەن تايۆانعا قاتىستى كۇشەيە تۇسكەن قىتايدىڭ ىقپالىنا قارسى ارەكەت رەتىندە قاراستىرىلدى.
پىكىر قالدىرۋ