سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين قازاقستاننىڭ جاڭا تەلەفون كودى "+997" بولىپ بەلگىلەنگەنىن حابارلاعان بولاتىن. ال، بۇل تۋرالى 1999–2001 جىلدار ارالىعىندا قازاقستان كولىك، تەلەكوممۋنيكاسيا جانە تۋريزم (كەيىننەن كولىك جانە كوممۋنيكاسيا) ءمينيسترى بولعان سەرىك بۇركىتبايەۆ "7 سانى كيەلى" ەكەنىن ايتادى. ەكس-مينيستر بۇل ويىن كاسىپكەر ارمانجان بايتاسوۆتىڭ Youtube ارناسىنا بەرگەن سۇحباتىندا جەتكىزدى.

21 قىركۇيەكتە مينيستر باعدات مۋسين "بۇۇ جانىنداعى حالىقارالىق ەلەكتر بايلانىس وداعى قازاقستانعا جاڭا "+997" دەف كودىن بەلگىلەدى. ەندى ءبىزدىڭ ەلدەن باسقا مەملەكەتكە قوڭىراۋ شالعاندا، شەتەلدىكتەردىڭ تەلەفونىندا قازاقستان دەگەن جازۋ شىعادى. سونداي-اق حالىقارالىق دەڭگەيدەگى سيفرلى سەرۆيستەردى قولدانعاندا دا، بارلىق جەردە قازاقستان دەگەن سيگنال شىعادى. كەزىندە كسرو تاراعاندا، "+7" حالىقارالىق تەلەفون كودى ەكى ەلگە بىردەي بەكىتىلگەن بولاتىن" دەپ مالىمدەگەن.

ءمۋسيننىڭ جاڭا دەف كود تۋرالى جاڭالىعىن  ەكس-مينيستر سەرىك بۇركىتبايەۆ سىنادى. 

ەكس-مينيستر قازىرگى ءمينيستردىڭ ەشقانداي امەريكا اشپاعانىن، قازىرگى دەف كودقا ءوزىنىڭ دە تىكەلەي قاتىسى بار ەكەنىن ايتتى.

بۇركىتبايەۆ 1999 جىلى بۇل ماسەلەمەن جەكە ءوزى اينالىسقانىن جانە  قازاقستاندى "+7" ايماعىندا ۇستاۋ ءۇشىن كۇرەسكەنىن، قازاقستانعا "+77" ەكى تاڭبالى تەلەفون كودىن بەلگىلەتكەنىن جەتكىزدى. 

ەكس-مينيستردىڭ سوزىنشە، كودتاعى ءبىرىنشى سان ەلدىڭ اتىن ەمەس، ابونەنتتىڭ گەوگرافيالىق ورنىن بىلدىرەدى. ول "+7" ورتالىق ەۋرازيانىڭ گەوگرافيالىق كودى ەكەنىن جەتكىزدى. بۇرىنعى كەڭەس وداعىنداعى بارلىق رەسپۋبليكالاردا العاشىندا "+7" كودى بولعانىن، قازىرگى ۋاقىتتا تەك رەسەي مەن قازاقستان عانا قالعانىن ايتتى. وزگە پوستكەڭەستىك ەلدەردىڭ باسقا كودقا اۋىسقانىن جەتكىزدى.

–ال ءبىز ءۇشىن كيەلى "7" سانىن ساقتاپ قالۋعا مەن ءوزىم كوپ كۇش سالدىم. كورشى مەملەكەتپەن كەلىسسوز جۇرگىزىپ، رەسەيلىك سەرىكتەستەر بىزگە جەڭىلدىكتەر جاساۋعا كەلىستى، ال ءبىز رەسەيمەن بىرگە "+7" سانىن ساقتاپ قالدىق،– دەيدى ەكس-مينيستر.

بۇركىتبايەۆتىڭ ايتۋىنشا قازاقستاننان شەتەلگە قوڭىراۋ شالعاندا "رەسەي" دەگەن بەلگى پايدا بولسا، بۇل بيلىكتىڭ نەمقۇرايلىعىن بىلدىرەدى. ول بۇل كەمشىلىكتى تۇزەتۋ قيىن شارۋا ەمەس ەكەنىن ايتادى.

–ءبىز رەسەيلىكتەرگە قارجى جاعىنان شىعىنعا بولسا دا "3" سانىن "7"-گە اۋىستىرۋعا دايىن ەكەنىمىزدى ايتتىق. ءبىراق جۇمىس ءبىز ويلاعاننان قيىن بولدى. سەبەبى قازىرگى زامانعى سيفرلىق مۇمكىندىكتەر الدەقايدا از بولدى جانە بەلدى ۇيىمدارمەن ەلشىلىكتەرگە حات جولداپ، بۇدان بىلاي قازاقستاننىڭ تەلەفون كودى "+77" دەن باستالاتىنىن بارىنە حابارلادىق. "+77" كودى ادەيى تاڭدالدى، سەبەبى تۇركىلەر مەن قازاقتار ءۇشىن "7" سانى كيەلى. نانىم، سەنىمنەن بولەك، "7" سانىنا قاتىستى ۇلكەن جوسپارلارىمىز بولدى،– دەيدى بۇركىتبايەۆ.