ەلوردادا «Nur Otan» پارتياسى مەن جازۋشىلار وداعى ءوزارا ىنتىماقتاستىق تۋرالى مەموراندۋمعا قول قويىپ، ونىڭ اياسىندا العاشقى شارا – «ۇلى دالا» رەسپۋبليكالىق شىعارماشىلىق بايقاۋىن وتكىزۋ، ەلىمىزدىڭ مادەنيەتى مەن ونەرىن دامىتۋ، ۇلتتىق قۇندىلىقتاردى ورىستەتۋ جايلى ىستەردى بىرلەسە اتقارۋ تۋرالى ورتاق ءباتۋاعا كەلدى. قول قويۋ راسىمىنە جازۋشىلار وداعىنىڭ ءتوراعاسى، اقىن ۇلىقبەك ەسداۋلەت، جازۋشى الىبەك اسقاروۆ، اقىندار نەسىپبەك ايت ۇلى، داۋلەتكەرەي كاپ ۇلى سىندى قالامگەرلەر، پارلامەنت ءماجىلىسىنىڭ دەپۋتاتتارى، «Nur Otan» پارتياسىنىڭ باسشىلىعى قاتىسىپ، مەموراندۋم شەڭبەرىندە الدا اتقارىلاتىن جوبالاردى پىسىقتادى.

جيىندا پارتيا ءتوراعاسىنىڭ ءبىرىنشى ورىنباسارى باۋىرجان بايبەك ەكى ۇيىمنىڭ مەملەكەتتىك جانە ۇلتتىق قۇندىلىقتاردى دارىپتەۋدە ماقساتتارىنىڭ توعىساتىن تۇستارى كوپ ەكەنىن العا تارتتى. ول ەكىجاقتى مەموراندۋمعا قول قويىپ، ەلباسى قويعان مىندەتتەردى بىرلەسە جۇزەگە اسىرۋ جوسپارلانىپ وتىرعانىن جەتكىزدى.

– بيىل – ەلىمىز ءۇشىن ايشىقتى جىل. وسى 30 جىلدا ءبىز قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ باسشىلىعىمەن مەملەكەتتىلىگىمىزدىڭ ىرگەسىن بەكىتىپ، شەكارامىزدى شەگەندەدىك، ىشكى-سىرتقى دامۋداعى باستى باعىتتارىمىزدى ايقىندادىق. مەملەكەت باسشىسى قاسىم-جومارت كەمەل ۇلى توقايەۆتىڭ باسشىلىعىمەن ساياسي-ەكونوميكالىق رەفورمالار ودان ءارى جالعاسىپ جاتىر. ەلدىڭ دامۋى تۋرالى ايتقاندا، الەۋمەتتىك-ەكونوميكالىق كورسەتكىشتەر عانا ەمەس، رۋحانيات ماسەلەلەرى دە ۇدايى نازاردا بولۋى ءتيىس. سەبەبى تاۋەلسىزدىكتىڭ باستى قۇندىلىقتارىن ەكشەيتىن، ونىڭ ءمانىن وسكەلەڭ ۇرپاققا جەتكىزەتىن – ادەبيەت پەن ونەر وكىلدەرى، – دەدى باۋىرجان بايبەك.

ونىڭ ايتۋىنشا، مەموراندۋمعا قول قويۋداعى باستى ماقسات – ەلىمىزدىڭ مادەنيەتىن دامىتۋ، ەلدىڭ ينتەللەكتۋالدىق ورەسىن كوتەرىپ، ەستەتيكالىق تالعامىن ۇشتاۋ، سونداي-اق، قازىرگى زامانعى جازۋشىلار مەن اقىنداردىڭ شىعارماشىلىعىن ناسيحاتتاۋ ارقىلى قازاق ادەبيەتىنىڭ جانە پوەزياسىنىڭ دامۋىن ىنتالاندىرۋعا باعىتتالعان بىرلەسكەن ءىس-شارالاردى جۇزەگە اسىرۋ.

وسى ورايدا پارتيا ءتوراعاسىنىڭ ءبىرىنشى ورىنباسارى جازۋشىلار وداعىمەن بىرلەسە وتىرىپ، جاس جازۋشىلار مەن اقىندار اراسىندا وتەتىن بيىلعى «ۇلى دالا» بايقاۋىنىڭ ءمانى مەن مازمۇنىنا توقتالدى. بايقاۋدىڭ ماقساتى – تاۋەلسىزدىكتىڭ العاشقى 30 جىلىندا ەلىمىزدىڭ جەتكەن جەتىستىكتەرىن، مەملەكەت ىرگەسىن بەكىتۋدەگى قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ جاسامپاز ءرولىن ايشىقتاۋ جانە قوعامدى رۋحاني جاڭعىرتۋدىڭ يدەيالارى مەن قۇندىلىعىن كورسەتەتىن قازىرگى زامانعى قازاقستاندىق اۆتورلاردىڭ شىعارمالارىن قولداۋ جانە ناسيحاتتاۋ.

بايقاۋ «پروزا»، «پوەزيا»، «دراماتۋرگيا»، «كوركەم فيلم مەن تەلەسەريال سەنارييى»»، «بالالارعا ارنالعان شىعارما» اتتى بەس نوميناسيا بويىنشا وتكىزىلىپ، ءارقايسىسى بويىنشا 3 جۇلدەلى ورىن انىقتالادى.

ءبىرىنشى ورىن (1 جۇلدە) ءۇشىن – 1 000 000 تەڭگە، ەكىنشى ورىنعا (1 جۇلدە) – 750 000 تەڭگە، ءۇشىنشى ورىنعا (1 جۇلدە) – 500 000 تەڭگە جۇلدە بەلگىلەنىپ وتىر.

بايقاۋعا 18-دەن 40 جاسقا دەيىنگى اقىندار، جازۋشىلار، دراماتۋرگتەر مەن سەناريستەر قاتىسا الادى.

ءوز كەزەگىندە قازاقستان جازۋشىلار وداعى باسقارماسىنىڭ ءتوراعاسى ۇلىقبەك ەسداۋلەت وسىنداي بايقاۋلاردىڭ «جۇزدەن جۇيرىك، مىڭنان تۇلپار» تالانتتاردىڭ ىرىكتەلىپ، كوپشىلىككە تانىلۋىنا سەپتەسەتىنىن العا تارتتى. ول ەل ىشىندەگى تالانتتاردىڭ تانىلۋىن ىنتالاندىرىپ، شىعارماشىلىققا، ونەرگە، مادەنيەتكە ۇدايى قامقورلىق تانىتاتىن پارتيا باسشىلىعىنا جازۋشىلار قاۋىمىنىڭ اتىنان ريزاشىلىعىن ءبىلدىردى.

– 30 جىلدا ءبىزدىڭ جەتكەن جەتىستىكتەرىمىز، ىركىلىستەرىمىز، جەمىستەرىمىز بەن جەڭىستەرىمىز، داعدارىس پەن كىدىرىس دەيتىن ماسەلەلەردى قالاي ەڭسەرىپ، قالاي جەڭگەنىمىز، قانداي بيىكتەرگە شىققانىمىز سونىڭ بارلىعى سيفرلاردا سايراپ جاتقانىنمەن، ولاردى شىعارماشىلىق ادامدارىنىڭ جۇرەگىنىڭ دومناسىندا قورىتىپ، وبرازعا وراپ، كوركەم تىلمەن بەينەلەپ، حالىققا كوركەم شىعارما رەتىندە ۇسىنىپ جاتسا، ول ۇرپاقتاردىڭ كوڭىلى مەن جۇرەگىندە ماڭگىلىك قالاتىنى ءسوزسىز. ال مەموراندۋم ويعا العان ىستەردى زاڭداستىرىپ بەرەتىن قۇجات بولعاندىقتان، وعان ءبىز قۋانا قول قويامىز. بايقاۋدىڭ ەرەجەسى دە كوڭىلىمىزدەن شىعىپ وتىر. بەس جانر بويىنشا بەس نوميناسيا بەلگىلەنگەن. تەلەسەريال سەنارييى بويىنشا نوميناسيا تاعايىنداۋ بۇرىن بولعان ەمەس. بۇدان بولەك بيىلعى جىل پرەزيدەنتتىڭ جارلىعىمەن «بالالار مەن جاسوسپىرىمدەردىڭ كىتاپ وقۋىن قولداۋ جىلى» بولىپ جاريالانعانىن بىلەسىزدەر. وسى ورايدا بالالار ادەبيەتىنە دە ارنايى نوميناسيانىڭ ارنالىپ وتىرعانى وتە قۇپتارلىق. بالالار ادەبيەتى وسىنداي قامقورلىقتىڭ ارقاسىندا ءبىر بەلەستەن اسىپ جاتسا، دۇنيەگە بالالار ءسۇيىپ وقيتىن شىعارمالار، جاڭا كلاسسيكا كەلىپ جاتسا، وندا «Nur Otan» پارتياسى مەن جازۋشىلار وداعىنىڭ بىرلەسكەن جوباسىنىڭ مۇراتىنا جەتكەنى، – دەدى ۇ.ەسداۋلەت.

ال «ۇلى دالا» بايقاۋى كوميسسياسىنىڭ ءتوراعاسى، بەلگىلى جازۋشى الىبەك اسقاروۆ وسىنداي شىعارماشىلىق بايقاۋلاردىڭ ماڭىزىنا توقتالىپ، وعان تۇسكەن جۇزدەگەن شىعارمانىڭ اراسىنان بىر-ەكى ۇزدىك تۋىندى انىقتالىپ جاتسا، ونىڭ ءوزى رۋحانياتىمىز ءۇشىن ۇلكەن جەتىستىك سانالاتىنىن ايتتى.

سودان كەيىن ءسوز العان پارلامەنت ءماجىلىسىنىڭ دەپۋتاتى، «Nur Otan» پارتياسى جانىنداعى رەسپۋبليكالىق «Miras» قوعامدىق كەڭەسىنىڭ ءتوراعاسى، اقىن جاناربەك ءاشىمجان پارتيانىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىندا رۋحانيات پەن مادەنيەتكە ءتيىستى نازار اۋدارىلىپ، ءبىرشاما جوبالار جۇزەگە اسقانىن العا تارتتى.

«رەسپۋبليكالىق «Miras» كەڭەسىنىڭ وسىعان دەيىن ەكى جيىنى ءوتتى. سول جيىندا ۇكىمەتكە ناقتى 28 ۇسىنىس بەرىلگەن. ولاردىڭ ءقازىر 25ء-ى جۇزەگە اسىپ، سول بويىنشا جۇمىس ىستەپ جاتىرمىز. ءۇش ۇسىنىسىمىز بويىنشا زاڭناماعا وزگەرىستەر كەرەك. زاڭ جوبالارى جەلتوقسان ايىندا كەلىپ تۇسەدى. سول زاڭنامالارعا وزگەرىستەر ەڭگىزىلگەننەن كەيىن، اسىرەسە، دۋبلياجعا قاتىستى ماسەلەنىڭ شەشىمىن تابامىز دەپ ويلايمىن. سوندىقتان بۇگىن مەموراندۋمنىڭ قابىلدانۋى ەرتەڭ قوعامدا ءوزىنىڭ لايىقتى باعاسىن الادى جانە جاڭا نوميناسيالاردىڭ قوسىلۋى بۇل زاماناۋي كينويندۋسترياعا، دۋبلياجعا قاتىستى ماسەلەلەردىڭ شەشىلۋىنە سەپتىگىن تيگىزەدى»، – دەدى ج.ءاشىمجان.

وسى ورايدا پارتيا ءتوراعاسىنىڭ ءبىرىنشى ورىنباسارى زيالى قاۋىمنىڭ قوعامدىق ومىردەگى بەلسەندىلىگى وتە جوعارى ەكەنىن اتاپ ءوتتى. ونىڭ ايتۋىنشا، 2020 جىلى پارتيا وتكىزگەن پرايمەريزگە رەسپۋبليكا بويىنشا 350-دەن اسا قالامگەر، پۋبليسيست، ايتىسكەر، جۋرناليست قاتىسقان.

«Nur Otan» پارتياسىنىڭ سايلاۋالدى باعدارلاماسىنىڭ اياسىندا دايىندالعان جول كارتاسى بويىنشا ەلىمىزدە 2025 جىلعا دەيىن 259 مادەنيەت وشاعى سالىنادى، 1241 مادەني نىسان جوندەۋدەن وتكىزىلىپ، 150 نىسانعا عىلىمي رەستاۆراسيا جۇمىستارى جۇرگىزىلەدى. شەت ەلدەردە «اباي» ورتالىقتارىنىڭ سانى ارتادى. سونداي-اق پارتيا 1500 مادەنيەت، ونەر جانە عىلىم قايراتكەرىن جىل سايىنعى مەملەكەتتىك الەۋمەتتىك تاپسىرىس اياسىندا قولداۋدىڭ جانە قاراجات ءبولۋدىڭ اشىقتىعىن قامتاماسىز ەتەدى. تاعى ءبىر جاڭالىق – ءبىز بيىلدان باستاپ «Ulttyq Mura» پارتيالىق جوباسىن بەكىتىپ، بارلىق مادەني-ادەبي شارالاردى كەشەندى تۇردە اتقارۋعا كىرىستىك»، - دەدى باۋىرجان بايبەك.

ەسكە سالا كەتەيىك، «ۇلى دالا» بايقاۋى 2019 جىلى وتكىزىلىپ، وعان 700-دەن استام شىعارما تۇسكەن بولاتىن. ولاردىڭ ىشىنەن 400 شىعارما ىرىكتەلىپ، 5 نوميناسيا بويىنشا ەلىمىزدىڭ تۇكپىر-تۇكپىرىنەن تالانتتى 15 جاس قالامگەر جۇلدەگەر اتاندى. تەك سوڭعى ءبىر جارىم جىلدا كوروناۆيرۋس پاندەمياسىنىڭ سالدارىنان ءبىراز ادەبي-مادەني جوبالار توقتاپ قالدى.

بايقاۋدىڭ شارتتارى بۇقارالىق اقپارات قۇرالدارىندا، پارتيانىڭ رەسمي سايتىندا جانە الەۋمەتتىك جەلىلەردەگى رەسمي اككاۋنتتارىندا، سونداي-اق اikyn.kz سايتىندا، «Miras» پارتيالىق جوباسىنىڭ Facebook پاراقشاسىندا جاريالانادى.

بايقاۋعا قاتىسۋ ءۇشىن جۇمىستاردى قابىلداۋ 2021 جىلعى 1 قازان مەن 30 قاراشا ارالىعىندا جۇزەگە اسىرىلادى. كەلىپ تۇسكەن جۇمىستار اikyn.kz سايتىندا «ۇلى دالا» ايدارى اياسىندا جاريالانادى. جەڭىمپازداردى ماراپاتتاۋ ءراسىمى قازاقستان رەسپۋبليكاسىنىڭ تاۋەلسىزدىگى كۇنى قارساڭىندا نۇر-سۇلتان قالاسىندا وتەدى.