كارتوپ باعاسى 200-250 تەڭگە، ال ءسابىز ودان 30-40 تەڭگەگە قىمباتتاۋى مۇمكىن. بۇل تۋرالى اۋىل شارۋاشىلىعى مينيسترلىگى وسىمدىك شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى ازات سۇلتانوۆ ايتتى. 

– ماۋسىمدىق باعا ءوسىمى كۇتىلەدى. ءبىراق باعا قولجەتىمدى بولادى. ءبىزدىڭ بولجامىمىزعا سايكەس، كەلەر جىلى ماۋسىم كەزىندە كارتوپتىڭ كەلىسى 200-250 تەڭگەنى قۇراسا، ءسابىز بەن قىزىلشانىڭ باعاسى 300 تەڭگەگە دەيىن بارىپ قالادى دەپ جوسپارلانىپ وتىر،– دەدى ول.

ونىڭ ايتۋىنشا وتاندىق كارتوپ وندىرۋشىلەر باعا تۇراقتىلىعىن ساقتاپ، ءونىم تاپشىلىعى بولماۋى ءۇشىن مامىر ايىنا دەيىن جەتەتىن قور جاساپ قويۋدى ۇسىنىپ وتىر. 

– ءقازىر اكىمدىك تاراپىنان ءتيىستى جۇمىستار قولعا الىنۋى قاجەت. كارتوپتى تۇراقتاندىرۋ قورىنا ساتىپ الىپ، ونى وسىرەتىن شارۋالارمەن الدىن الا كەلىسىمشارت راسىمدەۋى ءتيىس. ءبىز ءوز تاراپىمىزدان بارلىق جۇمىستى جاسادىق. اكىمدىكتەرگە كارتوپ وسىرۋشىلەردىڭ ءتىزىمىن بەردىك. نەگىزگى وبلىستار – پاۆلودار، قاراعاندى، اقمولا مەن سولتۇستىك قازاقستان. ءقازىر كارتوپتىڭ قاجەتتى قورىن جاساپ السا، كەلەسى جىلى باعا كۇرت كوتەرىلمەيدى. ارتىنان مامىر ايىندا وزبەكتىڭ كارتوبى دا كەلەدى. سوندىقتان باعانى ۇستاپ تۇرۋعا مۇمكىندىك بار، – دەدى ازات سۇلتانوۆ.

ايتا كەتەيىك بيىل كارتوپ پەن ءسابىز باعاسى شارىقتاپ كەتكەن. سولتۇستىك قازاقستان وبلىسىندا ءونىمنىڭ ءبىر كەلىسى 500 تەڭگەگە جەتتى. ال كەيبىر وڭىرلەردە ءسابىزدىڭ ءبىر كەلىسى 700-800 تەڭگەگە جەتكەن.