قالا حالقىن ازىق-تۇلىكپەن تولىققاندى قامتاماسىز ەتۋ ءارى ساپالى ءونىمدى ءوندىرۋ ماڭىزدى ماقساتتىڭ ءبىرى. بارلىق رەسۋرستاردى نازارعا الساق، قازاقستان اگروونەركاسىپتىك كەشەندەگى الەۋەتى جوعارى مەملەكەت رەتىندە ەسەپتەلەدى.

وسى رەتتە، شىمكەنت قالاسىنىڭ اۋىل شارۋاشىلىعى جانە ۆەتەريناريا باسقارماسى قالا حالقىن ازىق-تۇلىكپەن قامتۋ تۋرالى مالىمدەدى.

ولاردىڭ ايتۋىنشا، ازىق-تۇلىك تاۋارلارىنىڭ تۇتىنۋ نورماسىنا سايكەس، شىمكەنت قالاسىنىڭ حالقى ءبىر جىلدا ءبىرىنشى سۇرىپتى ۇننان – 14 256 توننا، قالىپتى بولكە ناننان – 77 529 توننا، روجكيدەن – 4 825 توننا، قاراقۇمىق جارماسىنان – 2 193 توننا، كۇرىش – 9 321 توننا، كارتوپ – 104 177 توننا، ءسابىز، پياز – 21 932 توننا، قىرىققاباتتان – 14 913 توننا، شەكەردەن – 19 739 توننا، كۇنباعىس مايىنان – 7 676 توننا، سيىر ەتىنەن – 16 449 توننا، تاۋىق ەتىنەن – 5 483 توننا، ايران، سۇتتەن – 92 663 توننا، جۇمىرتقادان – 155 717 200 دانا، تۇزدان – 2 401 توننا جانە سۇزبەدەن – 5 373 توننا تۇتىنادى ەكەن.

بۇگىندە الەۋمەتتىك ماڭىزى بار ازىق-تۇلىك ونىمدەرىنىڭ تىزىمىنە (ۇن، نان، ماكارون، قاراقۇمىق، كۇرىش، كارتوپ، ءسابىز، پياز، قىرىققابات، قانت، كۇنباعىس مايى مەن سارى ماي، سيىر جانە تاۋىق ەتى، ءسۇت، ايران، جۇمىرتقا، تۇز، سۇزبە) 19 ازىق-تۇلىك ءونىمى كىرەدى.

جالپى مەگوپوليس ءوزىن-وزى ءبىرىنشى سۇرىپتى ۇن، روجكي، كۇنباعىس مايى جانە تاۋىق جۇمىرتقاسىمەن 100 پايىزعا قامتاماسىز ەتە الادى. ال ءسۇت ونىمدەرىمەن – 50 پايىزعا، تاۋىق ەتىمەن – 41 پايىزعا، سيىر ەتىمەن – 65 پايىزعا جانە كوكونىس ونىمدەرىمەن – 10-15 پايىزعا قامتاماسىز ەتۋگە قاۋقارلى.

ماماندار تۇز، قاراقۇمىق جارماسى، كۇرىش جانە شەكەر سەكىلدى ازىق-تۇلىك تاۋارلارىنىڭ قالامىزدا وندىرىلمەۋىنە بايلانىستى ولار كورشىلەس وبلىستاردان جانە شەت مەملەكەتتەردەن تاسىمالداناتىنىن ايتتى.

سونىمەن بىرگە ولار قالادا الەۋمەتتىك ماڭىزى بار ازىق-تۇلىك تاۋارلارىنىڭ قورى، تاۋار وندىرۋشىلەردى، قويمالار مەن ساۋدا نىساندارىن قوسقاندا جەتكىلىكتى جانە دە تاپشىلىق بويىنشا ەشقانداي ءقاۋىپ جوق ەكەنىن مالىمدەدى.