گرۋزين قوعامدىق قورعاۋشىسى نينو لومجاريانىڭ ايتۋىنشا، گرۋزيادا قاماۋعا الىنعان ەكس-پرەزيدەنت ميحايل سااكاشۆيلي ءوزىن ساياسي تۇتقىن سانايدى جانە اشتىق جاريالاعان. قورعاۋشى سااكاشۆيلي قامالعان رۋستاۆي تۇرمەسىنە بارعانىن مالىمدەدى.

لومجاريا سونىمەن قاتار سااكاشۆيليدىڭ ۋكراينا ازاماتى رەتىندە ۋكراينا كونسۋلىمەن كەزدەسۋگە ءوتىنىش بىلدىرگەنىن مالىمدەدى.

ال گرۋزيانىڭ قازىرگى پرەزيدەنتى سالومە زۋرابيشۆيلي ەكس-پرەزيدەنت سااكاشۆيليدى ەشقاشان كەشىرمەيتىنىن ايتادى.

"ميحايل سااكاشۆيلي تبيليسيدەگى تۇرعىن ۇيلەردىڭ بىرىندە ۇستالعانىن ايتتى. ول جالعىز ەكەنىن جەتكىزدى" دەدى لومجاريا.

پرەمەر-مينيستر گاريباشۆيلي ەكس-پرەزيدەنت سااكاشۆيلي ۇستالعانىن، تۇتقىنداۋ كەزىندە دە، ودان كەيىن دە وعان كۇش قولدانىلماعانىن، سەبەبى ول قارسىلىق كورسەتپەگەنىن جانە جالعىز ەكەنىن اتاپ ءوتتى.

بىرنەشە قىلمىستىق ءىس بويىنشا ايىپتالعان سااكاشۆيلي كەشە تبيليسيدە قاماۋعا الىنعان.

ميحايل سااكاشۆيلي قىركۇيەكتىڭ باسىندا 2 قازاندا وتەتىن مۋنيسيپالدى سايلاۋ الدىندا گرۋزياعا ورالۋعا ۋادە بەرگەن. 

ول گرۋزيادا ەكەنىن ايتىپ، تەڭىز جاعالاۋىنداعى باتۋمي قالاسىنان ەل ازاماتتارىن بيلىك پارتياسىنا قارسى داۋىس بەرۋگە شاقىرعان ەكى بەينەروليك جاريالاعاننان كەيىن ۇستالدى. ونىڭ گرۋزيا شەكاراسىنان قالاي وتكەنى ءالى بەلگىسىز. 

سااكاشۆيلي 2004-2013 جىلدارى ەلدىڭ ءۇشىنشى پرەزيدەنتى بولدى جانە 2012 جىلى "گرۋزين ارمانى" پارتياسى بيلىككە كەلگەننەن كەيىن 2013 جىلى گرۋزيادان كەتتى.

تۇتقىندالعان ەكس-پرەزيدەنت سااكاشۆيليگە قانداي قىلمىستىق ايىپتار تاعىلدى؟

ميحايل سااكاشۆيليگە قاتىستى التى قىلمىستىق ءىس قوزعالدى: ول ەكى ءىس بويىنشا التى جىلعا باس بوستاندىعىنان ايىرىلدى، ال قالعان ءتورت قىلمىستىق ءىس تبيليسي قالالىق سوتىندا ءالى قارالۋدا.

سااكاشۆيلي سىرتتاي ەكى جاعداي بويىنشا ايىپتى دەپ تانىلدى:

2005 جىلى تبيليسيدە بەتپەردە كيگەن قارۋلى ادامداردىڭ وپپوزيسيا دەپۋتاتى ۆالەري گەلاشۆيليگە فيزيكالىق شابۋىل جاساۋ ءىسى.

2006 جىلى ساندرو گيرگۆليانيدى ءولتىرۋ ءىسى.

بۇل ەكى جاعدايدا دا سااكاشۆيلي بيلىكتى اسىرا پايدالانعانى ءۇشىن كىنالى دەپ تانىلدى.

قازىرگى ۋاقىتتا تبيليسي قالالىق سوتىندا تومەندەگىدەي ىستەر قارالادى.

- 2008 جىلدىڭ اقپانىندا ءتارتىپ ساقشىلارىنىڭ يمەدي تەلەارناسىنا زاڭسىز رەيد جاساۋ ءىسى؛

- 2007 جىلعى 7 قاراشاداعى ۇكىمەتكە قارسى جاپپاي نارازىلىق اكسيالارىن كۇشپەن تاراتۋ ءىسى؛

- 2000 جىلداردىڭ باسىندا Imedi تەلەارناسىن قۇرعان جانە رەيدتەن كەيىن ارنا مەنشىگىنەن ايىرىلعان ماگنات بادري (اركادي) پاتاركاسيشۆيليدىڭ مۇلكىن زاڭسىز تارتىپ الۋ ءىسى؛

مەملەكەت قاراجاتىن جىمقىرۋ ءىسى.

گرۋزيا پروكۋراتۋراسى سااكاشۆيليگە شەكارانى زاڭسىز بۇزعانى ءۇشىن قوسىمشا ايىپ تاعىلاتىنىن مالىمدەدى.