سولتۇستىك جانە وڭتۇستىك كورەيا بايلانىس جەلىلەرىن قالپىنا كەلتىردى.
جاقىندا كيم چەن ىن ەكى جاقتىڭ بايلانىسىن قالپىنا كەلتىرۋگە دايىن ەكەنىن ايتقان.
الايدا پحەنيان ولاردىڭ قارىم-قاتىناسىن قالپىنا كەلتىرۋ "وڭتۇستىك كورەيا بيلىگىنىڭ كوزقاراسىنا" بايلانىستى ەكەنىن ايتتى.
سولتۇستىك كورەيا جاقىندا ءوزىنىڭ اسكەري سىناقتارىن ۇدەتە ءتۇستى.
ءبىر ايعا جەتپەي ءتورت زىمىران ۇشىرۋ ارقىلى پحەنيان قارۋ-جاراق ءوندىرىسىن باسەڭدەتۋگە نيەتى جوقتىعىن ءبىلدىردى.
دۇيسەنبى كۇنى تاڭەرتەڭ وڭتۇستىك كورەيانىڭ بىرىگۋ مينيسترلىگى ەكى كورەيالىق شەنەۋنىكتەردىڭ تەلەفون ارقىلى سويلەسكەنىن حابارلادى. بۇل تامىز ايىنان بەرى العاش رەت بولىپ وتىر.
"وڭتۇستىك پەن سولتۇستىكتىڭ بايلانىس جەلىسىنىڭ قوسىلۋى ارقىلى ۇكىمەت كورەيارالىق قاتىناستاردى قالپىنا كەلتىرۋگە نەگىز قالاندى دەپ باعالايدى" دەلىنگەن مينيسترلىكتىڭ حابارلاماسىندا.
ەكى جاقتىڭ بايلانىس تەلەفوندارى بىرنەشە رەت توقتاتىلعان.
2020 جىلى سولتۇستىك پەن وڭتۇستىك اراسىنداعى ءساتسىز سامميتتەن كەيىن پحەنيان بايلانىستاردى جاقسارتۋ ءۇشىن سالىنعان كورەيارالىق شەكارا كەڭسەسىن جارىپ جىبەردى.
سول جىلى سولتۇستىك كورەيا شيەلەنىس كۇشەيگەننەن كەيىن وڭتۇستىكپەن بارلىق بايلانىس جەلىلەرىن، سونىڭ ىشىندە كوشباسشىلار مەن اسكەري بايلانىس ارنالارى اراسىنداعى سەنىم تەلەفونىن ءۇزدى.
سەنىم تەلەفونى وسى تامىزدا قالپىنا كەلتىرىلدى، ءبىراق وڭتۇستىك كورەيا اقش-پەن بىرلەسكەن اسكەري جاتتىعۋلارعا قاتىسقاننان كەيىن قايتادان ءۇزىلدى.
سولتۇستىك جانە وڭتۇستىك كورەيا تەحنيكالىق تۇرعىدا ءالى دە سوعىستا، سەبەبى 1953 جىلى كورەيا سوعىسى اياقتالعان كەزدە بەيبىت كەلىسىمگە قول جەتكىزىلمەدى.
پىكىر قالدىرۋ