ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا «Nur Otan» پارتياسى ءتوراعاسىنىڭ ءبىرىنشى ورىنباسارى بايبەك باۋىرجان قىدىرعالي ۇلى شىمكەنت قالاسىنا جۇمىس ساپارىمەن كەلدى.

«وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىنىڭ شىمكەنت قالاسىندا ورىندالۋ بارىسىمەن «Nur Otan» پارتياسى قالالىق فيليالىنىڭ ءتوراعاسى، قالا اكىمى مۇرات ايتەنوۆ تانىستىردى.

- «2025 جىلعا دەيىن جوسپارلانعان 475 ينديكاتوردىڭ 23%ء-ى ورىندالدى. قالادا 398 مىڭ شارشى مەتر تۇرعىن ءۇي، 5 مەديسينالىق مەكەمە مەن 115 سپورت الاڭى قولدانىسقا بەرىلدى. 250 مىڭ ادامدى ۇزدىكسىز ەلەكتر قۋاتىمەن قامتاماسىز ەتۋ ماقساتىندا «بوزارىق» ەلەكتر قوسالقى ستانسياسى سالىندى. گاز تاراتۋ ستانسياسىنىڭ قۇرىلىسى اياقتالۋدا، ول 5 شالعاي ەلدى مەكەندى تابيعي گازبەن قامتاماسىز ەتەتىن بولادى. 14 مىڭنان استام جاڭا جۇمىس ورنى اشىلدى» - دەدى ءوز سوزىندە قالا اكىمى.

سايلاۋالدى باعدارلامادا ءبىلىم بەرۋ سالاسى باستى نازاردا ەكەنى بەلگىلى. شىمكەنتتە تاياۋداعى 5 جىلدا 66 مەكتەپتى سالۋ جانە جوندەۋ جوسپارلانسا، بيىلدىڭ وزىندە 25 وقۋ ورنى سالىندى.

وسى رەتتە باۋىرجان قىدارعالي ۇلى № 79 جاڭا مەكتەپتە پەداگوگتەر ۇجىمىمەن كەزدەستى. پارتيانىڭ سايلاۋالدى ۋادەلەرىن ىسكە اسىرۋ اياسىندا پەداگوگتەردىڭ ەڭبەكاقىسى 2024 جىلعا قاراي 2 ەسە كوبەيىپ، ورتاشا العاندا 330 مىڭ تەڭگەدەن اساتىنىن دا جەتكىزدى.

پارتيا جاستار مەن ايەلدەر كاسىپكەرلىگىن قولداۋعا ەرەكشە نازار اۋدارادى. سوندىقتان شىمكەنتتە كاسىپكەرلىكتى جاڭادان باستاۋشىلارعا، ەڭ الدىمەن جاستار مەن ايەلدەرگە قولداۋ كورسەتەتىن ونلاين-ورتالىق اشقان «بولاشاق» باعدارلاماسىنىڭ تۇلەكتەرىمەن كەزدەسۋ ءوتتى.

ساپار سوڭىندا قالالىق ساياسي كەڭەس بيۋروسى مەن قوعامدىق كەڭەس توراعالارىمەن بىرگە تۇركىستان جانە قىزىلوردا وبلىستارىندا سايلاۋالدى ۋادەلەردىڭ ىسكە اسىرىلۋ بارىسىن ونلاين-فورماتتا تىڭدادى.

فيليالدار باسشىلىعى مەن ءماسليحاتتارداعى فراكسيالاردىڭ نازارىن جىل سوڭىنا دەيىن ورىندالماي قالۋ ءقاۋپى بار جەكەلەگەن تارماقتاردى ءجىتى قاداعالاپ، سونداي-اق وسى باعىتتاعى جۇمىستاردى كۇشەيتۋ قاجەتتىگىن ايتتى.