قىتايدىڭ زاڭ شىعارۋشى ورگانى اتا-انالارعا بالالارىنا ساباق بويىنشا شەكتەن تىس جۇكتەمە ارتۋعا تىيىم سالاتىن زاڭ جوباسىن ازىرلەپ جاتىر، دەپ حابارلادى سينحۋا اگەنتتىگى.

وتباسىلىق تاربيە تۋرالى زاڭ جوباسى كەشە حالىق وكىلدەرىنىڭ جالپىحالىقتىق جيىنىنىڭ تۇراقتى كوميتەتى سەسسياسىندا ءۇشىنشى وقىلىمدا تانىستىرىلعان.

زاڭ جوباسىنا ساي، اتا-انالار مەن بالالار قامقورشىسى بالالاردىڭ وقۋ، دەمالۋ، كوڭىل كوتەرۋ، فيزيكالىق جاتتىعۋ جاساۋى ءۇشىن كەتەتىن ۋاقىتىن ۇيىمداستىرۋعا ءتيىس. سونداي-اق اتا-انالار بالالارى ينتەرنەتكە تاۋەلدى بولىپ قالماۋىن قاداعالاۋعا مىندەتتى.

باسىلىم بالاسىنا ۇلكەن ءۇمىت ارتاتىن اتا-انالار ولاردىڭ جەتىستىككە جەتۋى ءۇشىن كوپ نارسەگە ءازىر ەكەنىن، 45 مينۋتتىق جەكە ساباق ءۇشىن 200 يۋان (شامامەن 13 مىڭ تەڭگە) تولەۋگە قينالمايتىنىن جازادى.

الايدا وقۋشىلارعا شامادان تىس جۇكتەمە ارتىلىپ، ولار ۇيقىسىزدىققا ءجيى شالدىعاتىن بولعان. كوزدەرى جاقىننان كورمەيتىندەر كوبەيگەن. بۇعان الاڭداۋشىلىق بىلدىرگەن جۇڭگو ۇكىمەتى ءبىلىم جۇيەسىن رەفورمالاۋ باستامالارىن كوتەرىپ ءجۇر.

زاڭ جوباسىندا قوزعالعان قاعيدالاردىڭ كەيبىرى ءۇي تاپسىرماسى مەن سىنىپتان تىس ساباقتاردى ازايتۋعا شاقىرادى. سونداي-اق ساباقتان تىس جاتتىعۋلاردى توقتاتۋعا قاتىستى ەرەجە تالقىلانىپ جاتىر.