شىمكەنتتەگى جاستارعا ۆاكسينالاۋدىڭ ماڭىزدىلىعى ناسيحاتتالدى. مەگاپوليستە ءىس-ساپاردا جۇرگەن «ەلىم ءۇشىن ەگىلەمىن» اتتى ازاماتتىق شتابتىڭ وكىلدەرى قاراتاۋ اۋداندىق جاستار رەسۋرستىق ورتالىعىندا قالاداعى بەلسەندى جاستارمەن كەزدەستى.
ەركىن فورماتتا وتكەن جيىندا قازاقستان زاڭگەرلەر وداعىنىڭ نۇر-سۇلتان قالاسىنداعى فيليال ءتوراعاسى، ازاماتتىق شتاب مۇشەسى سەرىك بەركامالوۆ پەن سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ ۆاكسينا قابىلداۋ شاراسىنىڭ ءمان-ماڭىزىن ءتۇسىندىردى.
ال كەزدەسۋدى قالالىق ىشكى ساياسات جانە جاستار ىستەرى جونىندەگى باسقارما باسشىسىنىڭ ورىنباسارى بەكسۇلتان ءادىلحانوۆ جۇرگىزىپ وتىردى.
كوميتەتتىڭ رەسمي وكىلى كەزدەسۋدە ەل كولەمىندە ءجۇرىپ جاتقان ىندەتكە قارسى كۇرەس شارالارى جونىندە دە وي ءبولىستى. ەرجان بايتانايەۆ سوڭعى مالىمەتتەردى كەلتىرە وتىرىپ، ۆاكسينالاۋدىڭ ماڭىزدى ەكەنىنە تاعى ءبىر توقتالىپ ءوتتى.
– ەلىمىزدە ەكپە سالدىرعاندار كورسەتكىشى بۇگىنگى تاڭدا ەداۋىر ۇلعايىپ، ۇجىمدىق يممۋنيتەت قالىپتاستىرۋدىڭ الدىندا تۇرمىز. دەگەنمەن ۆاكسيناسيالاۋعا بايلانىستى حالىق اراسىندا ءتۇرلى اقپاراتتار تاراپ جاتىر. ولاردىڭ باسىم كوپشىلىگى بالالار ۆاكسيناسىنا قاتىستى فەيك اقپاراتتار. ەل ۇكىمەتى بالالارعا كوروناۆيرۋسقا قارسى ەكپە سالۋ جۇمىستارىن باستاعان جوق. ءتىپتى، ونداي ۆاكسينا ەلىمىزگە اكەلىنگەن جوق. ءقازىر شەتەلدىك Pfizer ۆاكسيناسىن وندىرۋشىلەرمەن كەلىسسوز جۇرگىزىپ جاتىر. الداعى ۋاقىتتا ەلىمىزگە ەكپەنىڭ وسى ءتۇرى كەلسە، جۇكتى ايەلدەر مەن وقۋشىلار ۆاكسينالانۋى مۇمكىن. بۇل ءبىزدىڭ جوسپارىمىز. بالالارعا اتا-اناسىنىڭ نەمەسە قامقورشىسىنىڭ رۇقساتىنسىز، ال جۇكتى ايەلدەرگە وزدەرىنىڭ كەلىسىمىنسىز ەكپە ەگۋ جۇمىستارى جۇرگىزىلمەيدى. جالعان اقپاراتتارعا ەرمەي، اركىم ءوز دەنساۋلىعىن ويلاۋى قاجەت، - دەدى ە.بايتانايەۆ.
كەزدەسۋدە جاستار جاعى دا بەلسەندىلىك تانىتىپ، ەكپەگە قاتىستى وزدەرىن مازالاعان سۇراقتارىنىڭ جاۋاپتارىن الدى.
ا.جادىگەر ۇلى
پىكىر قالدىرۋ