«ەلىم ءۇشىن ەگىلەمىن» ازاماتتىق شتابىنىڭ وكىلدەرى شىمكەنتتەگى جۇمىس ساپارىن قورىتىندىلادى. ق ر پرەمەر-مينيسترى ورىنباسارىنىڭ باسپا ءسوز حاتشىسى، ق ر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆ جانە شىمكەنت قالاسى ىشكى ساياسات جانە جاستار ىستەرى جونىندەگى باسقارماسى باسشىسىنىڭ ورىنباسارى بەكسۇلتان ءادىلحانوۆ قالالىق اكىمدىكتىڭ اقپاراتتىق-كوممۋنيكاسيا ورتالىعىندا باسپا ءسوز بريفينگىن وتكىزدى. جيىنعا بەلگىلى ەپيدەميولوگ مامان ايناگۇل قۋاتبايەۆا نۇر-سۇلتان قالاسىنان Zoom كونفەرەنسياسى ارقىلى ونلاين قوسىلدى.

ەرجان حالي ۇلى كوروناۆيرۋس پاندەمياسىمەن كۇرەسۋ مەملەكەتتىڭ عانا ەمەس، ءار ازاماتتىڭ دا بورىشى ەكەنىنە توقتالىپ، بۇل تۇرعىدا ۆاكسينا الۋدىڭ ماڭىزدىلىعىنا توقتالدى.

– ەلىمىز بويىنشا كوروناۆيرۋسقا قارسى ۆاكسينا الۋ ناۋقانى اقپان ايىندا باستالدى. وسىعان وراي ازاماتتىق شتاب قۇرىلىپ، ونىڭ مۇشەلەرى ەلدىڭ ءار ءوڭىرىن ارالاپ ءجۇر. مۇنداعى ماقسات – ۆاكسيناعا قاتىستى جەكەلەگەن ازاماتتاردىڭ عانا ەمەس، جالپى بايلانىس پلاتفورمالارى ارقىلى كوپشىلىكتىڭ ساۋالدارىنا جاۋاپ بەرۋ، ەكپە الۋ تۋرالى ءتۇسىندىرۋ. مىسالى، وتكەن تاۋلىكتە ەلىمىز بويىنشا ۆيرۋس جۇقتىرعان دەگەن كۇدىكپەن تىركەۋگە الىنعان ازاماتتاردىڭ 98 پايىزى ۆاكسينا الماعان. بۇل تۇستا ەستە ۇستايتىن جايت – ۆاكسينا ۆيرۋستان تولىق قورعامايدى، تەك ۆيرۋس جۇققان جاعدايدا جەڭىل وتەدى. ال ريەۆاكسينا جوسپار بويىنشا قاراشا ايىنىڭ ءۇشىنشى ونكۇندىگىندە باستالادى دەپ جوسپارلاپ وتىرمىز، – دەدى ەرجان بايتانايەۆ.

شتاب وكىلى ۆەكتورلى ۆاكسينا العان ازاماتتار 9 ايدان كەيىن يناكتيۆتى ەكپەنىڭ 1 دوزاسىن، ال يناكتيۆتى ۆاكسينا العان ازاماتتار 6 ايدان كەيىن ۆەكتورلى ۆاكسينا الا الاتىندارىن ايتتى. ال Phiser ۆاكسيناسىن وندىرۋشىلەرمەن كەلىسسوز ءجۇرىپ جاتىر. ءساتتى اياقتالسا، ول ۆاكسينا جىلدىڭ IV توقسانىندا جەتكىزىلۋى مۇمكىن.

ەرجان قالي ۇلىنىڭ ايتۋىنشا، ەلىمىزدىڭ 11،4 ملن ازاماتى ۆاكسينا الا الادى. ماماندار ەكپە الۋدىڭ ناتيجەسى بويىنشا جازداعى ەپيدەميولوگيالىق جاعدايعا قاراعاندا كۇزدەگى احۋالدىڭ ەداۋىر جاقسارعانىن العا تارتتى.

بريفينگ بارىسىندا شتاب وكىلدەرى ب ا ق تىلشىلەرىنىڭ سۇراقتارىنا جاۋاپ بەردى.

نۋرلان بەكتايەۆ