«جاڭعىرۋ جولى» قوزعالىسىن قايتا قۇرعان ءجون. بۇل تۋرالى قازاقستان حالقى اسسامبلەياسىنىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.

بۇگىندە جاستار ساياساتى تاۋەلسىز قازاقستاننىڭ باستى باسىمدىقتارىنىڭ ءبىرى. جاستارعا ايرىقشا كوڭىل بولگەن مەملەكەت قانا ساياسي جانە ەكونوميكالىق تابىسقا جەتە الادى.

قازىرگى تاڭدا شىمكەنت قالاسى تۇرعىندارىنىڭ سانى 1 090 200 ادامعا جەتتى. ولاردىڭ ىشىندە جاستاردىڭ ۇلەسى جالپى حالىق سانىنىڭ 22،2%-ىن قۇرايدى. ياعني ءۇشىنشى مەگاپوليستە 239 443 جاس بار. شىمكەنتتە 9 جوعارى جانە 38 ارناۋلى وقۋ ورنى بولسا، وندا جالپى 113 881 ستۋدەنت ءبىلىم الادى.

جاستارمەن بىرىگىپ جۇمىس ىستەۋگە قازاقستان حالقى اسسامبلەياسى اسا ءمان بەرىپ كەلەدى.

100-دەن استام ەتنوس وكىلدەرى مەكەن ەتەتىن وڭىرىمىزدە 17 ەتنومادەني بىرلەستىكتىڭ جانىنان جاستار قاناتتارى قۇرىلعان. جوعارى جانە ورتا ارناۋلى وقۋ ورىندارىندا  29 «دوستىق» كلۋبى اشىلىپ، جۇمىس جاسايدى اسسامبلەيانىڭ قوعامدىق كەلىسىم مەن جالپىۇلتتىق بىرلىكتى نىعايتۋ بويىنشا قىزمەتىن قولداۋعا جاستاردى شوعىرلاندىرۋ ماقساتىندا 2018 جىلى «جاڭعىرۋ جولى» جاستار قوزعالىسىنىڭ شىمكەنت قالالىق شتابى قۇرىلدى. جاستار بىرلەستىگى رەتىندە قۇرىلعان ۇيىمنىڭ وسى مەرزىم ارالىعىندا جاساعان جۇمىستارى كوڭىل قۋانتارلىق.

«جاڭعىرۋ جولى» رجق وڭىرلىك شتابى مەن «Jas Otan» جق شىمكەنت قالالىق فيليالى اراسىندا ءوزارا تۇسىنىستىك، سەرىكتەستىك جانە ىنتىماقتاستىق تۋرالى مەموراندۋم ءتۇزىلدى. «قايىرىمدىلىق – قايىرلى ءىس» دەيتىن حالىق دانالىعىن باسشىلىققا العان ەتنوس جاستارى كوپبالالى جانە از قامتىلعان وتباسىلاردىڭ تۇرمىسىمەن تانىسىپ، قايىرىمدىلىق كومەك كورسەتتى.

سونداي-اق رەسپۋبليكالىق «BizBirgemiz» اكسياسىن قولداۋ ماقساتىندا پاندەميا كەزىندە قالامىزداعى قوعامدىق جۇمىستارعا 100-گە جۋىق شىمكەنت قالاسىنىڭ ۆولونتەرلارى جۇمىلدىرىلىپ، 20 مىڭعا جۋىق بەتپەردەلەر، مەديسينالىق قولعاپتار مەن دارى-دارمەكتەر تاراتىلدى. الداعى ۋاقىتتا بۇل باعىتتاعى جۇمىستار ودان ءارى جالعاساتىن بولادى.

«جاڭعىرۋ جولى» قوزعالىسىنىڭ جۇمىسىن جانداندىرۋعا ەرەكشە نازار اۋدارىلاتىن بولادى.

جاستاردى ەكونوميكالىق، الەۋمەتتىك سالانى نىعايتۋ، ەلدەگى قوعامدىق-ساياسي تۇراقتىلىقتى، كەلىسىمدى ساقتاۋ پروسەستەرىنە تارتۋ، جاستار مادەنيەتىن قالىپتاستىرۋ، ولاردىڭ جان-جاقتى دامۋىنا، ءبىلىم، زياتكەرلىك جانە كاسىبي-دەڭگەيىن ارتتىرۋ ماقساتىندا بىرنەشە جوبالار جۇزەگە اسىرىلادى.

قول جەتكىزگەن تابىستارىمىز بەن باعىندىرعان بيىك بەلەستەرىمىزدىڭ بارلىعى دەرلىك ءبىزدىڭ قوعامدا ورناعان قوعامدىق كەلىسىم مەن اۋىزبىرلىكتىڭ جانە جارقىن بولاشاققا دەگەن سەنىمنىڭ ناتيجەسى.

بۇكىل قازاقستاندىقتار ءۇشىن بىرلىك، دوستىق، تاتۋلىق ۇعىمدارىنىڭ ماڭىزى ايرىقشا. مىنە، وسىنىڭ ارقاسىندا ەل اۋماعىنداعى ورتاق ماقساتقا جۇمىلىپ، ەل يگىلىگى ءۇشىن ەڭبەك ەتىپ كەلەمىز.

“جول مۇراتى – جەتۋ” دەگەندەي، داڭقتى تاريحى بار ءبىزدىڭ حالقىمىزدىڭ باقىتتى بولاشاعى بولاتىنىنا سەنەمىن! تاۋەلسىزدىك تۋىن قولدا بەرىك تە بەكەم ۇستاۋ ءاربىر ازاماتتىڭ ەڭ باستى بورىشى، ەڭ بيىك مۇراتى.

ءاردايىم «ۇلتتىڭ ۇلى مۇراتى جولىندا ۇيىسايىق» دەگىم كەلەدى.

«جاڭعىرۋ جولى» جاستار قوزعالىسىنىڭ

شىمكەنت قالالىق شتابىنىڭ جەتەكشىسى

نۇركەن ءابدىرايىم