شىمكەنت قالاسىنداعى اباي اۋدانىندا 34 ەلدىمەكەن بولسا، ونداعى تۇرعىنداردىڭ بارلىعى ەلەكتر جارىعىمەن قامتىلعان. ونىڭ ىشىندە 8 ەلدى مەكەن ساپالى ەلەكتر ەنەرگياسىن جەتكىزۋدى قاجەت ەتەدى.

وسىنداي اۋماقتىڭ ءبىرى – «ايكول» ەلدى مەكەنى. بۇگىندە تۇرعىنداردى ساپالى ەلەكتر قۋاتىمەن قامتۋ بويىنشا قۇرىلىس جۇمىستارى جۇرۋدە. بۇل جۇمىستاردى وسى جىلدىڭ شىلدە ايىندا مەردىگەر مەكەمە «جولسەرىك» جشس-گى باستاعان. وسى ۋاقىت ىشىندە ەلەكتر باعانالارىن ورناتىلىپ، ۇزىندىعى 6 شاقىرىم بولاتىن ەلەكتر سىمى تارتىلدى. قازىرگى تاڭدا، قۇرىلىس جۇمىستارىنىڭ 97 پايىزى اياقتالدى. جىل سوڭىندا ەلدىمەكەندەگى 332 ادام ساپالى ەلەتكر ەنەرگياسىمەن قامتىلاتىن بولادى.

ايكول ەلدى مەكەنى اباي اۋدانىنا 2014 جىلى سايرام اۋدانىنان قوسىلعان. مۇنداعى 66 ءۇي بۇگىنگى تاڭدا جەكەنىڭ مەنشىگىندەگى ەلەكتردى تۇتىنىپ وتىر. سونىمەن بىرگە الداعى جىلدارى اتالعان اۋماق تازا اۋىز سۋمەن جانە كوگىلدىر وتىنمەن قامتىلادى.

جالپى اباي اۋدانىندا نۇرشۋاق، جاڭاتالاپ، ىنتىماق-2، باتىس، ايكول، يگىلىك، تاۋەلسىزدىككە 20 جىل، اقجار ەلدى مەكەندەرىن ساپالى ەلەكترمەن قامتۋ جۇمىستارى جۇرگىزىلۋدە. قۇرىلىس جۇمىستارىنىڭ ءبىرقاتارى جىلدىڭ سوڭىندا اياقتالسا، بىرنەشەۋى كەلەر جىلعا وتپەلى. وسىلايشا، 2022 جىلى اۋدان ساپالى ەلەكتر ەنەرگياسىمەن 100 پايىز قامتاماسىز ەتىلەدى.