شىمكەنت قالاسىندا 172 نۇسقاۋشى-باقىلاۋشى جانە 1207 ينتەرۆيۋەر ءۇي-ۇيدى ارالاپ، تىكەلەي حالىق ساناعىن وتكىزۋدە. ساناق پەرسونالى 1-30 قازان ارالىعىندا سانيتارلىق تالاپتاردى ساقتاي وتىرىپ، ەلەكتروندى پلانشەتتەرى ارقىلى ساۋالناما جۇرگىزەدى. ولارعا جۇكتەلگەن جاۋاپكەرشىلىك تە وراسان. ساۋالناما جۇرگىزۋشىلەرگە قولداۋ كورسەتىپ، بۇكىل ەل ءۇشىن ماڭىزدى شاراعا جۇمىلا، جاۋاپكەرشىلىكپەن قاراۋ قاجەت. بۇل تۋرالى قالا اكىمىنىڭ ورىنباسارى ەرعالي بىلىسبەكوۆ شىمكەنت قالاسى اكىمدىگىنىڭ «ينستاگرام» پاراقشاسىندا وتكەن تىكەلەي ەفير بارىسىندا مالىمدەدى. ەرعالي داۋلەتبەك ۇلى ۇلتتىق حالىق ساناعىنىڭ وتكىزىلۋ بارىسى جانە ءىس-شارانىڭ ماڭىزىنا توقتالىپ، تۇرعىندار ساۋالىنا جاۋاپ بەردى.

ء-قازىر بۇكىل ەلىمىز ءۇشىن ماڭىزدى كەزەڭ ياعني، ۇلتتىق حالىق ساناعى وتۋدە. ساناق حالىقتىڭ بارىن باعامداپ، قالاي ءومىر ءسۇرىپ جاتقانىمىز بەن ءارى قاراي دامۋ جولدارىن ايقىنداۋعا مۇمكىندىك بەرەدى. ماسەلەن، وتباسى قۇرامىن قايتا جازۋ ارقىلى بىزگە قانشا پەرزەنتحانا، قانشا مەكتەپ، قانشا اۋرۋحانا سالۋ كەرەكتىگىنە باعىت-باعدار الامىز. دەمەك، ساناق ارقىلى ساراپتاما جاساپ، بولاشاققا ناقتى جوسپار قۇرا الامىز،-دەدى ەرعالي بىلىسبەكوۆ.

ۇلتتىق حالىق ساناعىنىڭ ونلاين كەزەڭى 15ء-شى قازانعا دەيىن وتەدى. ازاماتتار ارنايى sanaq.gov.kz سايتى ارقىلى ساناق پاراقتارىن ءوز بەتىنشە تولتىرا وتىرىپ، ساناققا قاتىستى بارلىق سۇراقتارعا جاۋاپ بەرۋ مۇمكىندىگىنە يە. سونىمەن قاتار، egov.kz ەلەكتروندى ۇكىمەت پلاتفورماسى ارقىلى جانە ءموبيلدى ازاماتتار ءۇشىن «Aitu» ءموبيلدى قوسىمشاسى ارقىلى ۇلتتىق ساناققا قاتىسۋ مۇمكىندىگى قاراستىرىلعان.

مالىمەتكە جۇگىنسەك، بۇگىندە شىمكەنت قالاسى بويىنشا 253115 ادام (23%) ونلاين-ساناقتان وتكەن. حالىق ساناعىنىڭ جالپى قورىتىندىسى ەكونوميكالىق، دەموگرافيالىق جانە الەۋمەتتىك وزگەرىستەردى كورسەتىپ، قالانىڭ الداعى دامۋ باعىتىن ايقىندايدى.