تۇركيا پرەزيدەنتى رەجەپ تايىپ ەردوعان 10 مەملەكەتتىڭ ەلشىسىن "پەرسونا نون گراتا" دەپ جاريالاپ، ەلدەن شىعارۋدى بۇيىردى. بۇل تۋرالى ريا نوۆوستي حابارلادى.

باسىلىمنىڭ جازۋىنشا، تۇركيادان اقش، كانادا، فرانسيا، فينليانديا، دانيا، گەرمانيا، نيدەرلاند، جاڭا زەلانديا، نورۆەگيا، شۆەسيا سەكىلدى ەلدەردىڭ ەلشىلەرى شىعارىلادى. 

– تۇركيانىڭ سىرتقى ىستەر مينيسترلىگىنە كەلىپ، بىزگە بۇيرىق بەرۋگە بولمايدى. وسى ماسەلەگە قاتىستى سىرتقى ىستەر مينيسترىنە دەرەۋ شارا قولدانۋ كەرەكتىگىن ايتتىم. ياعني اتالمىش 10 ەلشىنى "پەرسونا نون گراتا" (ەلگە كىرۋىنە تيىم سالىنعان شەتەلدىك ساياساتكەر – رەد) دەپ جاريالاۋدى تاپسىردىم، – دەدى تۇركيا پرەزيدەنتى ەسكيشەحير قالاسىندا سويلەگەن سوزىندە.

ال بۇل ەلدەردىڭ ديپلوماتتارى نارازىلىق شەرۋلەرىن قارجىلاندىردى دەپ ايىپتالعان قۇقىق قورعاۋشى وسمان كاۆالانى بوساتۋدى تالاپ ەتكەن. وعان 2016 جىلعى مەملەكەتتىك توڭكەرىسكە قاتىسى بار دەگەن دە ايىپ تاعىلعان بولاتىن.

وسمان كاۆال قۇقىق قورعاۋشى ءارى ەتنيكالىق جانە ءدىني ازشىلىق توپتارىن قولدايتىن Anadolu Kültür AŞ مادەني قورىنىڭ نەگىزىن سالۋشى. ول 2013 جىلى ستامبۋلدىڭ گەزي ساياباعىنداعى نارازىلىق شەرۋىنە (ۇكىمەتتى بيلىكتەن كەتىرۋگە تالپىنۋ ارەكەتى-رەد) قاتىستى ءىس بويىنشا ايىپتالىپ، 2020 جىلدىڭ اقپان ايىندا اقتالىپ شىققان.

الايدا ستامبۋل پروكۋراتۋراسى سول كۇنى ونى قايتا قاماۋعا الۋعا وردەر بەرگەن. بۇل جولى وسمان كاۆال 2016 جىلى ەلدە مەملەكەتتىك توڭكەرىس جاساۋعا قاتىستى دەپ ايىپتالعان. سودان بەرى ول قاماۋدا وتىر.