ماڭعىستاۋ وبلىسىندا ماس جۇرگىزۋشى گاز قۇبىرىنا سوعىلىپ، كولىگى تولىعىمەن جانىپ كەتتى، دەپ حابارلادى لادا سايتى.

رەسمي مالىمەتكە سايكەس، جول اپاتى مۇنايلى اۋدانىنا كىرەتىن باسقۇدىق اۋىلىندا بولعان.

– ۋاز Patriot جۇرگىزۋشىسى ماس كۇيىندە رولگە وتىرىپ، كوشەدە كەلە جاتقاندا گاز قۇبىرىنا سوعىلعان. سوققى سالدارىنان ءورت شىعىپ، كولىك تولىعىمەن جانىپ كەتتى. وقيعا ورنىنا توتەنشە جاعدايلار مەن گاز قىزمەتىنىڭ ماماندارى كەلىپ، ءورتتى ءوشىردى. زارداپ شەككەندەر جوق، – دەيدى پوليسەيلەر.

ال كولىك جۇرگىزۋشىسى اكىمشىلىك قۇقىق بۇزۋشىلىق تۋرالى كودەكستىڭ 608-بابى، 3-تارماعى (جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، وزگە مۇلىكتى بۇلدىرۋگە اكەپ سوققان ارەكەتتەر) بويىنشا جاۋاپقا تارتىلعان.

وسى باپتا 20 تاۋلىككە اكىمشىلىك قاماققا الۋ جانە 7 جىلعا كولىك قۇرالىن باسقارۋ قۇقىعىنان ايىرۋ جازاسى قاراستىرىلعان.