شىمكەنت قالاسىنىڭ وپەرا جانە بالەت تەاترى ق ر تاۋەلسىزدىگىنىڭ 30 جىلدىعىنا وراي، ونەر سۇيەر قاۋىمعا الەمگە ايگىلى «سەلسكايا چەست» تارتۋ ەتىپ، كوپشىلىكتىڭ ىستىق ىقىلاسىنا بولەندى.
اتالعان وپەرانىڭ العاشقى پرەمەراسى 2017 جىلى شىمكەنت وپەرا جانە بالەت تەاترىندا ساحنالانعان بولاتىن. ۇزدىك تۋىندىنى ساحنالاۋعا الەمگە ايگىلى جانە ەلىمىزگە تانىمال ونەر مايتالماندارى جۇمىلدىرىلدى.
پ.ماسكانيدىڭ «سەلسكايا چەست» وپەراسىنىڭ پرەمەراسى العاش رەت 1890 جىلى ريم قالاسىندا «كوستانسي» تەاترىندا ساحنالانعان. ءبىر اكتىلى وپەرا جەلىسى سيسيليالىق اۋىلدا وتەدى. دج.ۆەرگيدىڭ نوۆەللاسىنىڭ وقيعا جەلىسىمەن جازىلعان وپەرا پ.ماسكانيدىڭ الەمگە ايگىلى ەڭ ۇزدىك جانە تانىمال شىعارمالارىنىڭ ءبىرى.
وپەرا كەيىپكەرلەرى اراسىنداعى قارىم-قاتىناستارمەن شيەلەنىستەر اۋەزدى مۋزىكامەن كومكەرىلىپ، كورەرمەندەرگە وقيعانى اسەرلى ەتىپ جەتكىزەدى.
«سەلسكايا چەست» وپەراسىندا جاستاردىڭ ماحاببات جولىنداعى كۇرەسى، ساتقىندىق، تالاس-تارتىس، سودان ءوربيتىن شىتىرمان ەلىكتىرەر وقيعا، قاندى كەكپەن اياقتالاتىن سيۋجەتتە ادامدىق ەموسيالار شەبەر سۋرەتتەلگەن.
باستى رولدە حالىقارالىق بايقاۋلاردىڭ لاۋرەاتى، ماسكەۋ قالاسىنان كەلگەن ەكاتەرينا گولوۆليەۆا – سانتۋسسا ءرولىن سومداپ شىقتى. تۋرريدۋ رولىندە وپەرامىزدىڭ ءسوليستى، حالىقارالىق كونكۋرستاردىڭ لاۋرەاتى جۇمابەك قاڭتاربايەۆ جانە وزبەكستان مەملەكەتى اليشەر ناۋاي تەاترىنان كەلگەن بەگزود سادىكوۆ وينادى.
قويىلىم رەجيسسەرى – قىرعىزستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى نۇرلان اسانبايەۆ، ديريجەر – تەمىرجان ەرجانوۆ.
رولدەردە قالالىق تەاتردىڭ سوليستەرى، حور، بالەت جانە سيمفونيالىق وركەستر ارتىستەرى ونەر كورسەتتى.
شىمكەنت قالاسى اكىمدىگىنىڭ باسپا ءسوز قىزمەتى
