ءبىلىم جانە عىلىم ءمينيسترى اسحات ايماعامبەتوۆ اپپارات جينالىسىندا مەكتەپ كىتاپحانالارىندا عىلىمي فانتاستيكا جانرىنا كوبىرەك كوڭىل ءبولۋدى تاپسىردى.

مينيستر مەكتەپتەردەگى كوركەم ادەبيەت قورىن ءارى قاراي ۇلعايتا ءتۇسۋدى جانە ونى ساتىپ الۋ بويىنشا ارتتا قالىپ كەلە جاتقان وڭىرلەردە جۇمىستى جانداندىرۋدى تاپسىردى.

– تەك ءبىر جىل ىشىندە 2،5 ميلليوننان استام جاڭا كوركەم ادەبيەت ساتىپ الىنىپ، ءتيىستى مەكتەپتەرگە جەتكىزىلدى. بۇل وتە ماڭىزدى جۇمىس. سوندىقتان بۇل جۇمىستى ءبىز مىندەتتى تۇردە جالعاستىرۋىمىز كەرەك. كوركەم ادەبيەت قورى ءارى قاراي دا ۇلعايتىلادى. بۇعان دەيىن مەكتەپ كىتاپحانالارىندا قازاق تىلىندەگى كوركەم ادەبيەتتىڭ وتە از ەكەنىن ايتىپ كەلدىك. وزدەرىڭىز كورىپ وتىرعانداي، ەندى كولەمى ۇلعايدى. ءبىراق "مەملەكەتتىك تىلدە" دەگەنىمىز ولاردىڭ بارلىعى قازاق اۆتورلارىنا تيەسىلى دەگەن ءسوز ەمەس. نەگىزىنەن دۇنيە ءجۇزى ادەبيەتىنىڭ تۋىندىلارى قازاق تىلىنە اۋدارىلعان. بۇدان وزگە تۇركىستان، قىزىلوردا جانە الماتى قالالارىندا وسى باعىت بويىنشا جۇمىستاردى جانداندىرا ءتۇسۋ قاجەت، – دەدى ول. 

ايماعامبەتوۆ سونداي-اق مەكتەپتەردە كۇن سايىن كىتاپ وقۋعا جيىرما مينۋت جۇمساۋدى تاپسىردى. 

– مەن ءارتۇرلى كىتاپحانانى ارالاپ، قاراپ ءجۇرمىن. ارينە، ءبىراز سەرپىلىس بار. وسى جۇمىستى ءارى قاراي دا جالعاستىرىپ، كەلەسى جىلعى بيۋدجەتتە ەسكەرۋ كەرەك. عىلىمي فانتاستيكا جانرى، اسىرەسە، بالالاردىڭ قيالىن دامىتۋ جانە كرەاتيۆتى ويلاۋىن دامىتۋعا كوڭىل بولگەنىمىز ءجون. كلاسسيكالىق ادەبيەتتەر دە بولۋى كەرەك. قازىرگى ۋاقىتتا وقۋشىلاردىڭ ءوزى ءسۇيىپ وقيتىن كىتاپتاردى تىزىمگە ەنگىزىپ، وقۋلىق ورتالىعى ءتيىستى جۇمىستاردى جالعاستىرۋى ءتيىس، – دەدى اسحات ايماعامبەتوۆ.