كەشە 27 قازاندا الماتىدا تۇرىك فيلمدەرىنىڭ اپتالىعى باستالدى. سوعان وراي "ارمان" كينوتەاترىندا تۇركيا رەسپۋبليكاسىنىڭ الماتىداعى باس كونسۋلدىعىنىڭ قولداۋىمەن ۇيىمداستىرىلعان "VI تۇرىك فيلمدەرى اپتالىعىنىڭ" اشىلۋ سالتاناتى ءوتتى.
تۇرىك فيلمدەرىنىڭ اپتالىعى رەجيسسەر مەحمەت ادا وزتەكيننىڭ "جەتىنشى كامەراداعى كەرەمەت" فيلمىمەن اشىلىپ، كورەرمەندەردىڭ زور ىقىلاسىنا بولەندى. بۇل فيلم – تۇركيادا ەڭ تانىمال بولعان فيلمدەردىڭ ءبىرى.
ءىس-شارا بارىسىندا تۇرىك فيلمدەرىنىڭ جانكۇيەرلەرى تۇركيادان كەلگەن "ەرتۋگرۋل. قايتا ءتىرىلۋ" سەريالىنىڭ اكتورى سەزگين ەردەمير مەن تۇرىك فيلمدەرى اپتالىعىنىڭ باس ۇيلەستىرۋشىسى ونەر كىلىچپەن كەزدەسىپ، شاعىن سۇحباتتارمەن الماستى. بەس كۇنگە سوزىلاتىن مادەني شارادا "باسكەتبول ساقيناسى"، "ماحاببات ءومىرى"، "حابارلاندىرۋ"، "ماۋزەر"، "رافادان تايفا: كىندىك توبە" فيلمدەرى "ارمان" كينوتەاترىندا تەگىن كورسەتىلەتىن بولادى.
شارا بارىسىندا ءسوز سويلەگەن تۇركيادان كەلگەن ۇيىمداستىرۋشىلار مەن قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆ پەن "قازاقفيلم" كينوستۋدياسىنىڭ ديرەكتورى اقان ساتايەۆ وسىنداي شارالار قازاقستان مەن تۇركيا اراسىنداعى مادەني بايلانىستاردىڭ جالدان-جىلعا نىعايىپ كەلە جاتقانىن ايتىپ، كينويندۋستريا سالاسىنداعى ىقپالداستىق بارىسىنا توقتالدى.
ەلەنورا ءامىر
پىكىر قالدىرۋ