28 قازان – حالىقارالىق انيماسيا كۇنى. بۇل سالادا جاپونيا ءوزىنىڭ انيمە دەپ اتالاتىن ءتول تۋىندىلارىمەن ميلليونداعان كورەرمەنىن تابا بىلگەن. انيمەنىڭ قازاقستاندا دا جانكۇيەرلەرى كوپ. الايدا وسى ۋاقىتقا دەيىن كورەرمەن انيماسيالىق فيلمدەردى تەك ورىس تىلىندە كورىپ كەلدى. وسى ولقىلىقتىڭ ورنىن تولتىرۋ ماقساتىندا الماتىدا بىرنەشە ەرىكتى جاستان تۇراتىن "Dopamine voice" دەپ اتالاتىن كوماندا ەشكىمنىڭ قولداۋىنسىز، قاراپايىم مۇمكىندىكتەرمەن تانىمال جاپون انيمەلەرىن قازاقشاعا دىبىستاۋمەن اينالىسىپ ءجۇر. توپ مۇشەسى بەكارىس يسماگۋلوۆ جوبانى پىكىرلەس ادامداردىڭ قىزىعۋشىلىعىنان تۋعانىن ايتادى.

توپ ءساۋىر ايىندا قۇرىلعان. بۇگىندە شىعارماشىل ۇجىمدا 2 ديزاينەر، 1 مونتاجداۋشى جانە 11 دىبىستاۋشى بار. بەكارىس يسماگۋلوۆ باستاپقىدا انيمەلەردى قازاقشا دىبىستاپ، ۇزىندىلەرىن ءوزىنىڭ تيك-توك جەلىسىنە سالىپ وتىرعان. كەيىن ونى مونتاجداۋشى بايقاپ، بىرگە جۇمىس ىستەۋدى ۇسىنعان.

– كىشكەنتايىمىزدان انيمەنى ورىس تىلىندە كورىپ وستىك. سول كەزدە "وسىلاردى نەگە قازاق تىلىنە اۋدارمايدى؟" دەپ ويلايتىنبىز. سوسىن جاقىننان بەرى بۇل ءىستى ءوزىمىز جاساپ كورۋگە بەل بۋدىق. انيمەلەردى تىكەلەي جاپون تىلىنەن اۋدارامىز. ارامىزدا اۋدارماشى بار. جاپون ءتىلى قازاق تىلىنە وتە ۇقساس. كوپتەگەن ارىپتەر قازاق ءتىلىنىڭ ىرعاعىنا كەلەدى. سول سەبەپتى انيمەلەردى ورىسشادان ەمەس، ءتۇپنۇسقادان اۋدارامىز، – دەيدى ول.

دىبىستاۋ پروسەسى وتە قاراپايىم. اۋدارماشى كەيىپكەر سوزدەرىن قازاقشاعا ءتارجىمالاپ، توپ مۇشەلەرىنە جىبەرەدى. ەرىكتىلەر داۋىستى ءارقايسىسى ءوز ۇيىندە، بولمەسىندە داۋىس جاڭعىرماس ءۇشىن كورپە جامىلىپ، سمارتفوننىڭ ديكتافونىنا جازادى. 

توپ مۇشەلەرى قازاقستاننىڭ تۇكپىر-تۇكپىرىندە تۇرادى. ولاردىڭ ءبىرى 14 جاستاعى وقۋشى بولسا، ءبىرى ستۋدەنت، ال ەندى ءبىرى قىزمەت ىستەيدى. اركىم ءوزىنىڭ پارتياسىن دىبىستاپ بولعان سوڭ استاناداعى مونتاجداۋشىعا جولدايدى.

– جاستاردىڭ باسىن قوسىپ وتىرعان ەڭ الدىمەن ورتاق قىزىعۋشىلىق بولسا، ەكىنشىدەن انا ءتىلىن پوپۋليزاسيالاۋ – دەيدى بەكارىس.

دىبىستالعان انيمە Telegram، Tiktok، Youtube جەلىلەرىندە جاريالانادى. از ۋاقىتتىڭ ىشىندە ولار ءوز كورەرمەنىن تابا بىلگەن. جوبا اسىرەسە تيك-توك جەلىسىندە تانىمال. ول جاقتا انيمەلەردىڭ كەي ۇزىندىلەرى 100 مىڭنان استام قارالىم جيناعان. ءتىپتى قازاق كونتەنتىن قولدايتىن كورەرمەندەر دونات جيناۋعا دا دايىن.

– بۇل جوبانىڭ بولاشاعى زور. قازاق ءتىلدى كورەرمەن ەندى-ەندى ءبىزدى تانىپ كەلەدى. ءتىپتى، ءار ءبولىم شىققان سايىن قولداۋ رەتىندە دونات جىبەرىپ وتىرادى. ماسەلەن، "تيتاندار شابۋىلى” انيمەسىن باستاماي تۇرىپ ءبىر كورەرمەن قولداۋ رەتىندە 40 مىڭ تەڭگە جىبەردى، – دەيدى ول.

بەكارىس كورەرمەن قولداۋىمەن ستۋديا اشىپ جاتقاندارىن، تاياۋدا كورەرمەندى ساپالى دۇنيەمەن قۋانتاتىنىن جەتكىزدى.

– ازىرگە بىزگە دەمەۋشىلەر تاراپىنان ەشقانداي دا ۇسىنىس تۇسپەدى. تەك كورەرمەننىڭ از دا بولسا قولداۋىنىڭ ارقاسىندا جاقىندا ستۋديا اشىپ جاتىرمىز، كەلەشەكتە كاسىبي تۇردە ءوزىمىزدى دامىتامىز، – دەيدى ول.

سۇحباتتاسقان

ديانا تۇرلىبەك