الماتى وبلىسى پانفيلوۆ اۋدانىنىڭ پەنجىم اۋىلىندا وقۋشىلاردىڭ جاپپاي توبەلەسىنەن زارداپ شەككەن بالا جانساقتاۋ بولىمىنەن جالپى پالاتاعا اۋىستىرىلدى. بۇل تۋرالى وبلىستىق دەنساۋلىق ساقتاۋ باسقارماسىنىڭ رەسمي وكىلى ءلايلىم اۋباكىروۆا حابارلادى.

– 2005 جىلى تۋعان ناۋقاس جانساقتاۋ بولىمىنەن تراۆماتولوگيا بولىمشەسىنە اۋىستىرىلدى. ال 1968 جىلى تۋعان ناۋقاس حيرۋرگيا بولىمشەسىندە ەم قابىلداپ جاتىر. قازىرگى تاڭدا ەكى ناۋقاستىڭ دا جاعدايى جاقسارىپ كەلەدى. دارىگەرلەر ولاردىڭ جاعدايىن ورتاشا اۋىرلىقتا دەپ باعالاپ وتىر. پاسيەنتتەرگە بارلىق قاجەتتى مەديسينالىق كومەك كورسەتىلىپ جاتىر،– دەدى الماتى وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ رەسمي وكىلى ءلايلىم اۋباكىروۆا.

ەسكە سالايىق، 27 قازان كۇنى پانفيلوۆ اۋدانىنىڭ پەنجىم اۋىلىندا وقۋشىلار اراسىندا جاپپاي توبەلەس بولدى. سالدارىنان 2005 جىلى تۋعان ءبىر وقۋشى اۋرۋحاناعا ءتۇسىپ،  1968 جىلعى ەر ادامنىڭ باسىنا تاس ءتيىپ، جاراقات العان. سونىمەن قاتار بىرنەشە ءۇي مەن كولىكتىڭ تەرەزەسى سىنعانى حابارلاندى.

دارىگەرلەر العاشىندا زارداپ شەككەن بالانىڭ دەنساۋلىق جاعدايى اۋىر ەكەنىن ايتقان. بۇگىندە اۋىلداعى ۇيلەردىڭ ماتەريالدىق شىعىندارى ەسەپتەلىپ جاتىر. قازىرگى ۋاقىتتا 30-دان استام ءۇيدىڭ تەرەزەلەرى تولىقتاي قالپىنا كەلتىرىلگەن.

اتالعان فاكتى بويىنشا قىلمىستىق كودەكستىڭ 293-بابىنىڭ 2-بولىگى (ءبىر توپ ادامدار جاساعان بۇزاقىلىق جانە دەنساۋلىققا قاساقانا اۋىر زيان كەلتىرۋ) بويىنشا قىلمىستىق ءىس قوزعالدى.كىنالىلەر سەگىز جىلعا دەيىن باس بوستاندىعىنان ايىرىلۋى مۇمكىن. ءقازىر پەنجىمدە پاترۋلدىك جاساقتار كەزەكشىلىكتى جالعاستىرۋدا. ولار تۇرعىنداردىڭ ءتارتىبى مەن قاۋىپسىزدىگىن قاداعالايدى.