ەڭبەك جانە حالىقتى الەۋمەتتىك قورعاۋ مينيسترلىگىنىڭ "ەڭبەك رەسۋرستارىن دامىتۋ ورتالىعى" كارانتيننىڭ بالا تۋۋعا اسەرى تۋرالى ەلارالىق زەرتتەۋ ناتيجەسىن جاريالاپ، ۇلتتىق ستاتيستيكالىق دەرەكتەردى تالداۋ، زەرتتەۋ جۇرگىزىلگەن ەلدەردىڭ كوپشىلىگىندە كارانتين تۋۋعا تەرىس اسەر ەتكەنىن كورسەتكەنىن ءمالىم ەتتءى.
مينيسترلىك تاراتقان حابارلامادا زەرتتەۋ بارىسىندا ساراپشىلار 2020 جىلعى قاراشادان باستاپ 2021 جىلدىڭ سوڭعى ايىنا دەيىنگى كەزەڭدە ءارتۇرلى ەلدەردەگى تۋۋ تۋرالى ناقتى دەرەكتەر وتكەن 4-5 جىلداعى تۋۋ قارقىنى نەگىزىندە ەسەپتەلگەنى، پاندەميا مەن باسقا وزگەرىستەر بولماسا، تۋۋ ينەرسياسى بويىنشا جۇرەتىن ترەند ماندەرىمەن سالىستىرىلعانى ايتىلادى.
"وسىلايشا پورتۋگاليادا، رۋمىنيادا جانە چيليدە تۋۋ دەڭگەيى سايكەسىنشە 9%-عا، 12%-عا جانە 19%-عا تومەن بولعانى بايقالدى. اقش پەن شۆەيساريادا مۇنداي تومەندەۋ 4-5%-دى قۇرادى. بەلگيا، يتاليا، سلوۆەنيا، يسپانيا، ۇلىبريتانيا، جاپونيا، سينگاپۋر، فرانسيا ەلدەرىندە تۋۋ كورسەتكىشى 1،3-2،5%-عا تومەندەدى (ترەندپەن سالىستىرعاندا).
الايدا كەيبىر ەلدەردە كارانتين جانە ونىمەن بايلانىستى شارالار بالانىڭ دۇنيەگە كەلۋىنە وڭ اسەر ەتتى. ماسەلەن تايۆاندا، نيدەرلاندتا، كورەيا رەسپۋبليكاسىندا ناقتى تۋۋ كورسەتكىشى ترەندتىك ماننەن 3،1-5،6%-عا اسىپ ءتۇستى" دەلىنگەن حابارلامادا.
ەڭبەك رەسۋرستارىن دامىتۋ ورتالىعى بولجامداۋ دەپارتامەنتى ديرەكتورىنىڭ ورىنباسارى قايىربەك اياشيەۆتىڭ سوزىنشە، نيدەرلاند، وڭتۇستىك كورەيا جانە تايۆان سەكىلدى ەلدەردە پاندەميا كەزىندە ەل ۇكىمەتىنىڭ داعدارىسقا قارسى ءساتتى شارالارىنىڭ ارقاسىندا جۇمىسسىزدىق دەڭگەيى تومەندەپ، تۇرعىنداردىڭ بيلىككە سەنىمى ارتقان. ال بۇل "بەبي-بۋمعا ىقپال ەتۋى مۇمكىن" دەپ تۇجىرىمدايدى ول.
زەرتتەۋدىڭ قازاقستانداعى تۋۋ جاعدايىنا بايلانىستى تۇسىندا، تۋۋ كورسەتكىشىنىڭ جوعارىلاۋى ۇكىمەتتىڭ كوپبالالى وتباسىلاردى قولداۋ شارالارىمەن بايلانىستىرىلعان.
قازاقستاندا تۋۋدىڭ كۇرت ءوسۋى 2020 جىلدىڭ III توقسانىنان باستاپ بايقالادى – تۋعاندار سانى 116،7 مىڭدى قۇرادى، بۇل – 2019 جىلعى III توقسانعا قاراعاندا 8،4%-عا ارتىق. 2020 جىلعى IV توقساندا ءوسىم 2019 جىلعى IV توقسانعا قاراعاندا 9،5%-دى قۇرادى. 2021 جىلعى I-II توقسانداردا ءوسىم 2020 جىلعى ءتيىستى توقساندارعا قاراعاندا 8،4 جانە 10،7%-دى قۇرادى.
"بىزدە كارانتين بەبي-بۋمعا اكەلدى دەگەن پىكىر كەڭ تارالعان، الايدا، 2020 جىلعى III جانە IV توقسانىنىڭ كوپ بولىگىندە بۇل تۇجىرىم تەرىس ەكەنىن اڭعارۋعا بولادى. 2020 جىلعى III توقساندا تۋعان بالالار 2019 جىلدىڭ IV توقسانىندا، ءتىپتى ۋحان تۇرعىندارى جاڭا جۇقپالى كوروناۆيرۋس تۋرالى حاباردار بولماعان كەزدە بويعا بىتكەن. سونداي-اق، قازاقستاندا 2020 جىلعى IV توقساندا تۋعان بالالاردىڭ از عانا بولىگى كارانتين كەزىندە بويعا ءبىتۋى ىقتيمال، ويتكەنى العاشقى كارانتيندىك شەكتەۋلەر 2020 جىلدىڭ ناۋرىز ايىنىڭ ورتاسىندا-اياعىندا ەنگىزىلدى" دەپ ءتۇسىندىردى ساراپشى.
ەڭبەك رەسۋرستارىن دامىتۋ ورتالىعى قازاقستاندا 2020 جىلى بالا تۋۋ كورسەتكىشىنىڭ ءوسۋىنىڭ نەعۇرلىم ىقتيمال سەبەبى رەتىندە، 2020 جىلعى 1 قاڭتاردان باستاپ تابىسىنا قاراماستان، ءتورت جانە ودان دا كوپ بىرگە تۇراتىن كامەلەتكە تولماعان بالالارى نەمەسە 23 جاسقا دەيىنگى كۇندىزگى وقۋ ءبولىمىنىڭ ستۋدەنتتەرى بار وتباسىلار ءۇشىن اي سايىنعى جاڭا جاردەماقىنىڭ ەنگىزىلۋىن اتاۋدا. بۇل رەتتە جاردەماقىنىڭ ەنگىزىلۋى تۋرالى 2019 جىلدىڭ قازان-جەلتوقسانىندا جاريالاندى.
"2020 جىلى قازاقستاندا 426 824 بالا دۇنيەگە كەلدى، بۇل 2019 جىلمەن سالىستىرعاندا 24 514 بالاعا كوپ. بالا تۋۋ ءوسىمىنىڭ باسىم بولىگى (65%) كەزەكتىلىك بويىنشا ءتورتىنشى بالانىڭ تۋۋى ەسەبىنەن قامتاماسىز ەتىلدى. بالا تۋۋدىڭ 24%-عا ءوسۋى بالالاردىڭ تۋۋ كەزەگى بويىنشا بەسىنشى ەسەبىنەن قامتاماسىز ەتىلدى. وسىلايشا، قازاقستاندا كوپبالالى وتباسىلار بويىنشا جاڭا اي سايىنعى جاردەماقى، نەگىزىنەن كەزەك بويىنشا 4 جانە 5 بالانىڭ تۋىلۋىن ىنتالاندىرادى" دەپ تۇيىندەدى قايىربەك اياشيەۆ.
سوڭعى قولجەتىمدى مالىمەتتەرگە سايكەس، 2021 جىلدىڭ قاڭتار-تامىزىندا قازاقستاندا 296،5 مىڭ بالا دۇنيەگە كەلدى، بۇل وتكەن جىلدىڭ سايكەس كەزەڭىمەن سالىستىرعاندا 8،4%-عا كوپ.
كوپبالالى وتباسىلارعا تاعايىندالاتىن جاردەماقى مولشەرى تومەندەگىدەي:
- 4 بالاعا – 42 496 تەڭگە؛
- 5 بالاعا – 53 127 تەڭگە؛
- 6 بالاعا – 63 757 تەڭگە؛
- 7 بالاعا – 74 388 تەڭگە؛
- 8 بالاعا – 88 896 تەڭگە؛
- 9 بالاعا – 100 008 تەڭگە؛
- 10 بالاعا – 111 120 تەڭگە؛
- 11 بالاعا – 122 232 تەڭگە؛
- 12 بالاعا – 133 344 تەڭگە؛
- 13 بالاعا – 144 456 تەڭگە؛
- 14 بالاعا – 155 568 تەڭگە؛
- 15 بالاعا – 166 680 تەڭگە؛
- 16 بالاعا – 177 792 تەڭگە؛
پىكىر قالدىرۋ