شىمكەنت قالاسىندا قالا اكىمىنىڭ تاپسىرماسى نەگىزىندە، ءبىلىم سالاسىندا بەس جىلعا ارنالعان جۇيەلى جوسپار قۇرىلعان. ءبىلىم سالاسى زەردەلەنىپ، 72 جاڭا مەكتەپتىڭ قۇرىلىسى جوسپارلانىپ وتىر.

بەكىتىلگەن قۇجاتتا ءۇشاۋىسىمدى مەكتەپتەر ماسەلەسىن تولىقتاي شەشۋدى جانە مەكتەبى جوق ەلدى مەكەندەرگە مەكتەپ سالۋ جوباسى قارالعان. بيىل قالاداعى ءۇشاۋىسىمدى مەكتەپ سانى 19-دان 10-عا كەمىسە، 2024 جىلعا كەلىپ بۇل ماسەلە تۇبەگەيلى شەشىمىن تابادى.

قالادا ءبىلىم ساپاسىن جاقسارتۋ ماقساتىندا ەڭ اۋەلى ۇستازداردىڭ بىلىكتىلىك دەڭگەيىن كوتەرۋ كوزدەلىپ وتىر. ءقازىر ءبىلىم مەكەمەلەرىندە جوعارى جانە ءى ساناتتى ۇستازدار 59،5 پايىزدى قۇراسا، 2025 جىلى 85،9 پايىزعا ارتادى.

سونىمەن قاتار، الداعى بەس جىلدا تەحنيكالىق جانە كاسىپتىك ءبىلىم بەرۋ سالاسىندا دۋالدى وقىتۋدىڭ ۇلەسىن ارتتىرۋ كوزدەلگەن. بولاشاق مامانداردى وقۋ ورنى مەن كاسىپورىندار بىرلەسىپ ءبىلىم بەرۋى – تۇلەكتەردىڭ جۇمىسقا ورنالاسۋ كورسەتكىشىن جوعارىلاتادى.

وسىعان وراي، شىمكەنت قالاسىن دامىتۋ جول كارتاسىنا سايكەس دۋالدى وقىتۋ بويىنشا ستۋدەنتتەر سانىن ارتتىرىپ، 2021 جىلى 11،3%، 2022 جىلى 18،1%، 2023 جىلى 22،6%، 2024 جىلى 27،1%، 2025 جىلى 42% دەيىن كوتەرۋ جوسپارلانىپ وتىر. دۋالدى وقىتۋ بارىسىندا جۇمىس بەرۋشىلەردىڭ سۇرانىس، تالاپتارىنا ساي كاسىپتىك-تەحنيكالىق ماماندار دايارلانادى. ناتيجەسىندە ەڭبەك نارىعىنا قاجەتتى جاس مامانداردى دايارلاۋدا تەك ءبىلىم ۇيىمدارى ەمەس، جۇمىس بەرۋشى مەكەمەلەردىڭ دە جاۋاپكەرشىلىگى ارتادى.