بۇگىن شىمكەنت قالاسىنىڭ اكىمى مۇرات ايتەنوۆ قالاداعى زەينەتكەرلەردى ساۋىقتىرۋعا ارنالعان «اسىل جۇرەك» ورتالىعىنىڭ جۇمىسىمەن تانىستى. وندا قىزمەت الۋشىلارمەن تىلدەسىپ، قارتتار كۇنى مەرەكەسىمەن قۇتتىقتادى.

مەملەكەت تاراپىنان ارداگەرلەرگە ءارقاشان قامقورلىق كورسەتىلىپ كەلەتىنىن جانە كورسەتىلەتىن كومەكتىڭ كولەمى جىل سايىن ارتىپ وتىرعانىن ايتقان قالا باسشىسى بۇل باعىتتاعى جۇمىستار پرەزيدەنتتىڭ مەملەكەتتىك ساياساتىنداعى باسىم باعىتتارىنىڭ ءبىرى ەكەنىن اتاپ ءوتتى.

شىمكەنتتەگى الەۋمەتتىك-مەديسينالىق «اسىل جۇرەك» ورتالىعى 2019 جىلدىڭ ناۋرىز ايىندا اشىلعان. مۇندا كۇنىنە 4 ساعات اقىسىز جارتىلاي ستاسيونارلىق جاعدايىندا مەديسينالىق جانە ارناۋلى الەۋمەتتىك قىزمەتتەر كورسەتىلەدى. ورتالىق ەكى اۋىسىمدا جۇمىس جاساپ، ءبىر اۋىسىمدا 80 ادامعا دەيىن قىزمەت كورسەتەدى.

بۇل جەردە كۇن ءتارتىبى زەينەتكەرلەردى دارىگەرلىك تەكسەرۋدەن باستالادى. قارتتارعا قىزمەت كورسەتۋ ءۇشىن جوعارى ساناتتى كارديولوگ، تەراپيەۆت، نيەۆروپاتولوگ جانە فيزيوتەراپيەۆت دارىگەرلەرى جۇمىلدىرىلعان. جۋىردا مەكەمەدە فيزيوتەراپيا كابينەتى اشىلىپ، كوپفۋنكسيونالدى «پوليماگ» قوندىرعىسى ىسكە قوسىلدى.

ورتالىقتا جىل باسىنان بەرى 235 زەينەتكەر ەكى اي كولەمىندە ارناۋلى الەۋمەتتىك قىزمەت الدى. الداعى ۋاقىتتا ورتالىقتىڭ قالا اۋداندارىندا بولىمشەلەرىن اشۋ جوسپارلانۋدا.

ايتا كەتەيىك، بۇگىندە شىمكەنت قالاسى بويىنشا زەينەتكەرلەر سانى – 82 351، سونىڭ ىشىندە ۇوس ارداگەرلەر سانى – 12، تىل ەڭبەككەرلەرى – 2848.