شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن ينۆەستيسيالىق شتابتىڭ كەزەكتى وتىرىسى ءوتتى. جيىندا جاڭا جوبالار مەن وزەكتى ماسەلەلەر، اۋدانداردا 2021 جىلدارعا بەكىتىلگەن ينۆەستيسيالاردىڭ، حاتتامالىق تاپسىرمالاردىڭ ورىندالۋ بارىسى تالقىلاندى.

جيىندا «Zoom» جۇيەسى ارقىلى جەكە كاسىپكەرلەر جاڭا جوبالارىن ۇسىندى. قۇرىلىس، ساۋدا، كوپقاباتتى تۇرعىن ءۇي باعىتىندا، جالپى 8 جوبا تانىستىرىلدى.
اتاپ ايتقاندا، «اسابايەۆ د.ە» جك مەتالل كونسترۋكسيالار دايىنداۋ ءوندىرىسى، لاك-بوياۋلارى، رەسپيراتورلار كاسىپورنى، «Orient Ceramic» كومپانياسىنىڭ كەراميكالىق پليتالار ءوندىرىسى جوباسى تانىستىرىلدى.
سونداي-اق، «BAZIS Shymkent» ج ش س، «ۇلى-وردا» ج ش س، «Prestige House» ج ش س كوپقاباتتى تۇرعىن ءۇي، «ابدييەۆا ا» جك بيزنەس ورتالىعىن سالۋعا نيەتتى ەكەنىن جەتكىزدى.

ۇسىنىلعان جوبالاردىڭ ىشىندە 4 جوبا قۇرىلىس يندۋسترياسىنا قىزمەت ەتەتىن كاسىپورىندار. ولار قارقىن العان قۇرىلىس سالاسىن وتاندىق ونىمدەرمەن تولىقتىرىپ، شىمكەنت قالاسىن قۇرىلىس يندۋسترياسى دامىعان ورتالىققا اينالۋىنا ىقپال ەتەدى.

قالا اكىمى بارلىق جوبالارعا قولايلى جاعداي جاسالاتىنىن، جەر تەلىمى جانە ينفراقۇرىلىم ماسەلەلەرى دەر كەزىندە شەشىلەتىنىن ايتىپ، كاسىپكەرلەردى ينۆەستيسيا سالۋعا شاقىردى.