1 قازان حالىقارالىق قارتتار كۇنىنە وراي شىمكەنت قالالىق وپەرا جانە بالەت تەاترىندا «دومالاق انا» وپەراسىنىڭ قويىلىمى ءوتتى. اتالعان شاراعا قالانىڭ تۇكپىر-تۇكپىرىنەن قازىنالى قاريالار شاقىرىلدى. مەرەكەگە ارنايى قويىلعان وپەرا بۇل جولى تەگىن كورسەتىلىپ وتىر.

قالالىق وپەرا جانە بالەت تەاترىندا قارتتار كۇنىنە وراي «دومالاق انا» وپەراسى قويىلدى. بۇل جولعى قويىلىم تەگىن، ۇجىمنىڭ قاريالارعا سىيلىعى دەيدى ۇيىمداستىرۋشىلار. سپەكتاكلدى تاماشالاۋعا ارنايى كەلگەن 81 جاستاعى ابدۋراحىم ابدراشيدوۆ تە قويىلىمنان جاقسى اسەر العانىن، ۇلكەن تولعانىسپەن قابىلداعانىن جەتكىزدى.

ابدۋراحىم ابدراشيدوۆ، قاراتوبە اۋىلىنىڭ تۇرعىنى
- مەن قاراتوبەدەن ارنايى كەلدىم. كەلىپ، كورىپ، قۋانىشتى بولىپ وتىرمىز. جاسىم 81-دە. شاقىرىپ، ارتىستەر بىزدەر ءۇشىن قىزمەت ەتىپ، جاقسى كونسەرت، وپەرا بەرىپ جاتىر. ءوزىم وزبەك ۇلتىنىڭ وكىلىمىن. بۇل ۇلتتار اراسىنداعى قۇرمەت، بىر-بىرىمىزگە سىيلاستىق دەپ بىلەمىن.

قويىلىمنىڭ تۇساۋكەسەرى ناۋرىز ايىندا وتكەن. سودان بەرى تۇراقتى كورسەتىلىپ كەلەدى. ساحنالاناتىن ءاربىر قويىلىمعا 4-5 اي كولەمىندە دايىندىق جۇرگىزىلەتىن كورىنەدى. «سەبەبى ءبىر قويىلىم ارقىلى ءبىز تاريحتى ناسيحاتتايمىز» دەيدى تەاتر ارتىستەرى.

ءۇرالحان سەيىلبەكوۆا، شىمكەنت قالالىق وپەرا جانە بالەت تەاترىنىڭ ءسوليستى
- «دومالاق انا» وپەراسىندا مەن دومالاق انانىڭ، نۇريلانىڭ ءرولىن سومدايمىن. ول وتە ۇلكەن جاۋاپكەرشىلىك. وعان ۇلكەن دايىندىقپەن كەلدىك. ءاربىر ورىندالاتىن ارياسىن، دۋەەتتەرىن جەكە، بىرگە دايىندالىپ، بۇكىل ۇجىم بولىپ دايىندالىپ، وسى ساحنادا بىرنەشە كۇن دايىندىقتامىز. مىنە، بۇگىن كورەرمەنگە ۇسىنىپ وتىرمىز».

«دومالاق انا» وپەراسى تەاتردىڭ «تاۋەلسىزدىكتىڭ 30 جىلدىق مەرەكەسى» اياسىندا قويعان العاشقى سپەكتاكلى. ەكى مەرەكەنى ۇشتاستىرا ۇيىمداستىرىلعان شاراعا ونەرسۇيەر قاۋىم دا ءوز ريزاشىلىعىن ءبىلدىردى.

ايتا كەتەيىك، اتالعان قويىلىم قالامىزداعى وپەرا جانە بالەت تەاترىندا 31 – رەت كورسەتىلىپ جاتىر.