شىمكەنتتە قالانى جاسىل جەلەككە اينالدىرۋ جانە كوگالداندىرۋ جۇمىستارى ۇدايى باستى نازاردا. بۇگىنگى تاڭدا مەگاپوليستە 8 ساياباق، 39 گۇلزار بار. ولاردىڭ بارلىعىنا ارنايى قىزمەتكەرلەر كۇن سايىن ەرەكشە كۇتىم جۇرگىزەدى. شىمكەنت قالالىق جايلى ورتانى دامىتۋ باسقارماسىنىڭ باسشىسى عالىمجان يلياسوۆ 30 جىلدا ەكولوگيا باعىتىندا تالاي ءىس تىندىرىلعانىن، دەگەنمەن ءالى دە اتقارىلاتىن شارۋا كوپ ەكەنىن ايتادى.

ونىڭ ايتۋىنشا، ەۋروپا ەلدەرىندە ءار ادام باسىنا 24 شارشى مەتر جاسىل جەلەكتەن كەلەدى ەكەن. ال ەلىمىزدەگى الماتىدا – 13 شارشى مەتر، شىمكەنتتە 5-6 شارشى مەتردى قۇرايدى. جالپى ستاندارت بويىنشا جان باسىنا شاققاندا جاسىل جەلەك 10 شارشى مەتردەن كەم بولماۋى ءتيىس. سوندىقتان شىمكەنت قالاسىنىڭ اكىمى مۇرات ايتەنوۆتىڭ حاتتامالىق تاپسىرماسىنا جانە شاھاردى كوگالداندىرۋ مەن كورىكتەندىرۋگە بايلانىستى جاسالعان ارنايى باعدارلاماعا سايكەس 2025 جىلعا قاراي قوسىمشا 23 گۇلزار، 4 ساياباق سالىنادى.

«قالادان 23 جەر اۋماعىنان گۇلزارلار سالۋ جوسپارلانعان. ول ايماقتاردا جىل سايىن گۇلزارلار سالىنادى. كەلەسى جىلعا 6 اۋماقتا گۇلزار قۇرىلىسىن جۇرگىزۋ جوسپاردا تۇر. شىمسيتي شاعىناۋدانىنان 47 گەكتار اۋماققا ساياباق سالىنادى. ول كولەمى جاعىنان شاھارداعى دەندروساياباقتان كەيىنگى ەكىنشى ۇلكەن پارك بولادى. بيىل «فيركان سيتي» ساۋدا–ويىن-ساۋىق ورتالىعىنىڭ ماڭىنداعى بۇرىنعى قوقىس پوليگونىنىڭ ورنىنان سالىنىپ جاتقان جاڭا ساياباقتىڭ قۇرىلىسى اياقتالىپ، پايدالانۋعا بەرىلەدى. جانە كەلەسى جىلى 12-شاعىناۋداندا 1.6 گەكتار اۋماقتى قۇرايتىن تاعى ءبىر ساياباقتىڭ قۇرىلىسى اياقتالادى»،-دەدى باسقارما باسشىسى.