شىمكەنت قالاسىندا ق ر تاۋەلسىزدىگىنىڭ 30 جىلدىعىنا وراي جاس اقىندار اراسىندا رەسپۋبليكالىق «كۇمىس دومبىرا» ايتىسى ءوتتى. ەلىمىزدە العاش رەت ۇيىمداستىرىلىپ وتىرعان بايگەدە جاستار جارقىراي كورىندى.

ءىس-شارانىڭ ماقساتى – تاۋەلسىزدىكتىڭ 30 جىلدىعىندا جەتكەن جەتىستىكتەردى ناسيحاتتاۋ، جاس اقىنداردىڭ ىشكى مۇمكىندىكتەرىن اشىپ، شابىتتارىنا قانات ءبىتىرۋ. ءتول ونەرىمىز ايتىستىڭ جاس بۋىن وكىلدەرى اراسىندا جاڭا ەسىمدەرمەن تولىعۋىنا ۇلەس قوسىپ، دارىندى جاستاردى قولداۋ.

اتالمىش ايتىسقا 14 پەن 29 جاسقا دەيىنگى 30 ايتىسكەر اقىن قاتىسۋعا نيەت ءبىلدىرىپ، ىرىكتەۋ ناتيجەسى بويىنشا 16 اقىن باقتارىن سىنادى. قاتىسۋشىلارعا بەلگىلى ايتىسكەر اقىندار مەن ەلىمىزگە تانىمال قوعام بەلسەندىلەرى ءوز باعاسىن بەرىپ، قازىلىق ەتتى.
شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، شىمكەنت قالاسى ءماسليحاتىنىڭ حاتشىسى باحادىر نارىمبەتوۆ جەڭىمپازداردى قۇتتىقتاپ، باعالى سىيلىقتارمەن ماراپاتتادى.

سايىس ناتيجەسى بويىنشا اقمولا وبلىسىنىڭ وكىلى نۇرماحان جاقىپبەك باس جۇلدە – «كۇمىس دومبىرا» يەگەرى اتاندى. 16 اقىننىڭ ىشىنەن وزا شاپقان جەڭىمپاز كۇمىستەن جاسالعان دومبىرا جانە باعالى سىيلىققا يە بولدى.

ايشولپان تولەۋتاي (شىعىس قازاقستان وبلىسى) 1ء-شى ورىنعا يە بولسا، بەكسۇلتان ورىنباساروۆ (قىزىلوردا وبلىسى) 2ء-شى ورىن، مەيىرجان جاقىپ (تۇركىستان وبلىسى) پەن نۇرعالي ءاناپيا (شىمكەنت قالاسى) 3ء-شى ورىندى جەڭىپ الدى.

سونىمەن قاتار، «مايلىقوجا سۇلتانقوجا ۇلى» اتىنداعى ارنايى جۇلدە بەكجان بازاربەككە (الماتى قالاسى)، «اسەلحان قالىبەكوۆا» اتىنداعى ارنايى جۇلدە ايىم اسىلبەكقىزىنا (نۇر-سۇلتان قالاسى) بۇيىردى. بارلىق جەڭىمپازدارعا ارنايى باعالى سىيلىقتار تابىس ەتىلدى.