مەملەكەت باسشىسى قاسىم-جومارت توقايەۆتىڭ 2020 جىلعى 1 قىركۇيەكتەگى قازاقستان حالقىنا ارناعان «جاڭا جاعدايداعى قازاقستان: ءىس-قيمىل كەزەڭى» اتتى جولداۋىنىڭ 143 تارماعىنا سايكەس، «تۇرعىن ءۇي قاتىناستارى تۋرالى» ق ر زاڭىنا مۇلىك يەلەرىنىڭ بىرلەستىكتەرىن نەمەسە جاي سەرىكتەستىكتى ەنگىزۋ جونىندە رەفورما قابىلداندى. سونىڭ نەگىزىندە كوپقاباتتى تۇرعىن ۇيلەردە مۇلىك يەلەرىنىڭ بىرلەستىگىن (ميب) جانە جاي سەرىكتەستىك (جس) قۇرۋ بويىنشا جول كارتاسى جانە مەديا جوسپار بەكىتىلىپ، تۇراقتى جۇمىستار قولعا الىندى.

وسىعان وراي شىمكەنت قالاسىنىڭ اباي اۋدانى اۋماعىندا ميب جانە جس بويىنشا اتقارىلعان جۇمىستارعا قىسقاشا توقتالساق، اتالعان اۋداندا 453 كوپقاباتتى تۇرعىن ءۇي بار. سونىڭ ىشىندە 374 كوپقاباتتى ءۇي كوندومينيۋم نىسانى رەتىندە ادىلەت باسقارماسىندا تىركەلگەن. ءوز كەزەگىندە اۋداندا كوندومينيۋم وبەكتىسى رەتىندە تىركەۋدەن وتكەن كوپقاباتتى تۇرعىن ۇيلەردە ميب پەن جس قۇرۋ بويىنشا حالىققا ءتۇسىندىرۋ جۇمىستارىنىڭ مەديا جوسپارى بەكىتىلىپ، بۇل بويىنشا تۇراقتى جۇمىستار اتقارىلۋدا. وسىعان وراي، بۇگىنگى تاڭعا دەيىن اۋدان اكىمشىلىگىنىڭ ۇيىمداستىرۋىمەن كوپقاباتتى ۇيلەردە ميب جانە جس قۇرۋدىڭ تيىمدىلىگىن ءتۇسىندىرۋ بويىنشا تۇرعىندارمەن 574 جينالىس ۇيىمداستىرىلدى. سونىڭ ناتيجەسىندە، 389 كوپقاباتتى تۇرعىن ءۇيدىڭ كەلىسىم حاتتاماسى جاسالدى. ول ءۇي كولەمىنە شاققاندا 76،6 % پايىزدى قۇراپ وتىر. بۇگىنگى تاڭدا 289 كوپقاباتتى تۇرعىن ۇيدە جاي سەرىكتەستىك جانە 58 كوپقاباتتى تۇرعىن ۇيدە مۇلىك يەلەرىنىڭ بىرلەستىگى قۇرىلىپ، قالالىق ادىلەت دەپارتامەنتىندە تىركەلدى. وتكەن اپتادا كوپقاباتتى ءۇي تۇرعىندارىمەن 31 جينالىس وتكىزىلىپ، حاتتامالارىن ءتۇزۋ بويىنشا جۇمىستار جۇرگىزىلدى.

بۇگىنگى تاڭعا دەيىن ءال-فارابي اۋدانى اكىمشىلىگىنىڭ ۇيىمداستىرۋىمەن كوپقاباتتى ۇيلەردە باسقارۋدىڭ جاڭا نىسانىنا كوشۋ بويىنشا تۇرعىندارمەن 517 جينالىس وتكىزىلدى. سونىڭ ناتيجەسىنە وراي 53 كوپقاباتتى تۇرعىن ۇيدە مۇلىك يەلەرىنىڭ بىرلەستىگى قۇرىلىپ، قالالىق ادىلەت دەپارتامەنتىندە تىركەۋگە الىندى. سونداي-اق، 275 تۇرعىن ۇيدە جاي سەرىكتەستىك قۇرىلدى. قوسىمشا مۇلىك يەلەرىنىڭ بىرلەستىگىن قۇرۋعا بايلانىستى 33 كوپقاباتتى تۇرعىن ۇيدەن كەلىسىم حاتتامالارى جيناقتالۋدا.

قاراتاۋ اۋدانىندا ميب جانە جس-نى ءتۇسىندىرۋ ماقساتىندا تۇرعىندارمەن 83 كەزدەسۋ جانە 18 ونلاين جينالىس ۇيىمداستىرىلدى. جالپى العاندا اۋدان بويىنشا 10 ميب جانە 287 جس قۇرىلدى. سونىمەن قاتار، تۇسىندىرمە جۇمىستارىنىڭ ناتيجەسىندە قالعان كوپقاباتتى ۇيلەردەن حاتتامالار جيناقتالۋ ۇستىندە.

ءا.نۇرجىگىت ۇلى