ءماجىلىس قازاقستان تاۋەلسىزدىگىنىڭ 30 جىلدىعىنا بايلانىستى راقىمشىلىق جاساۋ تۋرالى زاڭ جوباسىن ماقۇلدادى. زاڭ جوباسىن ىشكى ىستەر ءمينيسترى ەرجان تۇرعىمبايەۆ تانىستىردى.

ءمينيستردىڭ مالىمەتىنشە، راقىمشىلىق ونشا اۋىر ەمەس جانە اۋىرلىعى ورتاشا قىلمىس ءۇشىن جازادان بوساتۋدى، كەيبىر اۋىر، اسا اۋىر قىلمىستار ءۇشىن جازا مەرزىمىن قىسقارتۋدى كوزدەيدى. راقىمشىلىق ارداگەرلەرگە، كامەلەتكە تولماعاندارعا، جاسى ۇلكەندەرگە، ءى جانە ءىى توپتاعى مۇگەدەكتەرگە، سونداي-اق ىشكى ىستەر مينيسترلىگى "قوعامعا ءقاۋىپ توندىرمەيدى" دەپ تاپقان ادامدارعا قولدانىلادى.

تۇرعىمبايەۆ ەل بويىنشا 64 مەكەمە، 16 تەرگەۋ يزولياتورىندا 34 مىڭ ادام بار ەكەنىن، ولاردىڭ ىشىندە 30 مىڭ ازاماتقا سوت ۇكىمى شىققانىن، 4 مىڭ ادام تەرگەلىپ جاتقانىن ايتتى. ونىڭ 93 پايىزى اۋىر جانە اسا اۋىر قىلمىس جاساعانى ءۇشىن قاماۋدا وتىر. 32 مىڭ ادام پروباسيالىق باقىلاۋدا.

راقىمشىلىق اكسياسىنا ساي، 2236 سوتتالۋشىعا، 11310 پروباسيادا تۇرعان ادامعا امنيستيا جاسالادى. ونىڭ ىشىندە 1000 ادام قاماۋدان شىعادى، 3818 ادام پروباسيالىق باقىلاۋدان بوساتىلادى. 1294 سوتتالۋشىعا، 7492 پروباسيادا تۇرعان ادامعا جازا مەرزىمى قىسقارتىلادى.

سونداي-اق سوتقا دەيىنگى تەرگەۋ وندىرىسىندەگى 5 مىڭ قىلمىستىق ءىس قىسقارتىلادى. ونىڭ ىشىندە 1674 ادام قىلمىستىق جاۋاپكەرشىلىكتەن بوساتىلادى. 1471 ادامعا سوت ورگاندارى جازا مەرزىمىن قىسقارتادى نەمەسە بوساتۋ شاراسىن قولدانادى.

قىلمىستىق كودەكستىڭ 78-بابىنا ساي اسا اۋىر قىلمىس جازاعان ادامدارعا راقىمشىلىق قولدانىلمايدى.