اقش پرەزيدەنتى دجو بايدەن جۇڭگو مەن رەسەي باسشىلارىن "COP26" كليماتتىق سامميتىنە كەلمەگەنى ءۇشىن سىنعا الدى. بۇل تۋرالى BBC حابارلادى.
سەيسەنبى كۇنى كەشكە سويلەگەن سوزىندە بايدەن كليمات تاقىرىبى ۇلكەن ماسەلە ەكەنىن ايتىپ، جۇڭگو بۇل ماسەلەدە "تەرىس قاراپ كەتتى"، "ۇلكەن قاتەلىك جاسادى" دەدى. بايدەن بەيجىڭ "رەسەي جانە پۋتينمەن بىردەي" جۇمىس ىستەگەنىن ايتتى.
"جۇڭگو الەمدىك كوشباسشى رەتىندە الەمدە جاڭا ءرولىن بەكىتۋگە تىرىسىپ جاتقانى تۇسىنىكتى، ءبىراق مۇندا كەلمەدى" دەگەن بايدەن سي ءسزينپيننىڭ بولماۋى "ۇلكەن قاتەلىك" دەپ قوستى.
رەسەي پرەزيدەنتى ۆلاديمير پۋتين دە، جۇڭگو باسشىسى سي سزينپين دە ۇلىبريتانيانىڭ گلازگو قالاسىندا ءوتىپ جاتقان سامميتكە كەلمەگەن.
ەكى ەل دە كەلىسسوزدەرگە تەك دەلەگاسيالارىن جىبەردى. سامميت ەكى اپتاعا جالعاسىپ، 14 قاراشاعا دەيىن جالعاسادى.
كومىرقىشقىل گازىن اۋاعا شىعارۋدا دۇنيە ءجۇزى بويىنشا جۇڭگو ءبىرىنشى ورىندا، ودان كەيىن اقش تۇرادى. رەسەي ەو مەن ءۇندىستاننان كەيىنگى بەسىنشى ورىندا.
شوتلانديانىڭ ەڭ ۇلكەن قالاسىندا وتكەن كونفەرەنسياعا 120-دان استام كوشباسشى قاتىستى.
ەلدەر 2030 جىلعا قاراي اۋاداعى كومىرقىشقىل گازى دەڭگەيىن تومەندەتۋگە، سونداي-اق سول جىلعا دەيىن ورمانداردى وتاۋدى توقتاتۋعا جانە قايتا ورمان وسىرۋگە ۋادە بەرىپ، كەلىسىپ جاتىر. سونىمەن قاتار وزگە دە ءىرى كەلىسىمدەردى جاريالادى.
جۇڭگو دا، رەسەي دە ورمانداردى وتاۋدى توقتاتۋ تۋرالى ۋادەگە قول قويعان ەلدەر. كرەمل پرەسس-رەليزىنە سايكەس، بايدەننىڭ سوزىنەن بۇرىن پۋتين سەيسەنبى كۇنى "COP26" سامميتىندە ورماندى باسقارۋ جونىندەگى كەڭەستە ءسوز سويلەپ، رەسەي ورمان القاپتارىن ساقتاۋ ءۇشىن "ەڭ كۇشتى جانە ەڭ ناتيجەلى شارالاردى" قولدانىپ جاتقانىن ايتتى.
ايتا كەتەيىك، بۇعان دەيىن ۇلىبريتانيادا عالامدىق كليمات ءسامميتى ءوتىپ جاتقانى جانە سامميتتە اقش پرەزيدەنتى دجو بايدەننىڭ الەم ەلدەرىنەن كەشىرىم سۇراعانى حابارلانعان.
پىكىر قالدىرۋ