قاراتاۋ ءداستۇرلى ونەر مەكتەبىنىڭ جانە شىمكەنت قالالىق «جاستار رەسۋرستىق ورتالىعىنىڭ» ۇيىمداستىرۋىمەن ق ر تاۋەلسىزدىگىنىڭ 30 جىلدىعى مەن جامبىل جابايەۆتىڭ 175 جىلدىعىنا وراي «قاراتاۋ مەن سىردىڭ ەلى داستۇرمەنەن جىردىڭ كەنى» اتتى قىزىلوردا وبلىسى مەن شىمكەنت قالاسى ءداستۇرلى انشىلەرىنىڭ كونسەرتى ءوتتى.

– جالپى بۇگىن قاراتاۋ مەكتەبىنە سىر ءوڭىرىنىڭ - قىزىلوردا وبلىسىنىڭ ءداستۇرلى انشىلەرى، جىرشىلارى، ونەرپازارى قوناققا كەلىپ جاتىر. بۇل ەندى رەسمي ءىس-شارا ەمەس. كەزىندە ءبىرجان سال بابامىز سوناۋ ارقادان اقشوقىعا ابايدى ىزدەپ بارىپتى، بولماسا جەتىسۋعا سارانى ىزدەپ بارىپتى دەگەن بابادان قالعان ءداستۇرلى جول بار. سول جولدى جاڭعىرتىپ، «سىزدەردىڭ مەكتەپتەرىڭىزدى زيارات ەتسەك، قوناق بولىپ بارساق، ەسەسىنە بىرلەسىپ سول جەردە حالىققا رۋحاني كەش سىيلاساق» دەگەن سىر ءوڭىرىنىڭ ءداستۇرلى ونەرپازدارىن بۇگىن مەكتەبىمىزگە قوناق قىلىپ جاتىرمىز. بۇل جەردە تازا شىعارماشىلىق بايلانىس. جىر تىڭداپ جۇرەگىمىزدى اشامىز، ءان تىڭداپ ارقامىزدى كەڭەيتەمىز دەگەن كەز كەلگەن كورەرمەنىمىزگە ەسىگىمىز اشىق. سىر ولكەسىنىڭ ەلىمىزگە بەلگىلى جىرشىسى «دارىن» مەملەكەتتىك جاستار سىيلىعىنىڭ لاۋرەاتى كۇنسۇلۋ تۇرىكپەن قارىنداسىمىز باستاپ 13 ازاماتى، ءداستۇرلى انشىلەرى مەكتەبىمىزگە كەلدى. كەشە شاعىن فورماتتا كەزدەسۋ وتكىزدىك. مەكتەپتىڭ اۋ-جايىمەن تانىستى. قاراتاۋ ءداستۇرلى مەكتەبىنىڭ نەگىزگى باعىتى دا وسى ءداستۇرلى ونەردى، ناسيحاتتاۋ، ۇلىقتاۋ. سوندىقتان ءبىز «كۇمىس دومبىرا» دەپ ايتىسىمىزدى، «كۇمىس قالام» دەپ پوەزيا بايقاۋىن وتكىزدىك. ەندى نەگە ءداستۇرلى انشىلەرىمىزگە، سودان كەيىن كۇيشىلەرىمىزگە كوڭىل بولمەسكە. بۇيىرسا وسى ءىس-شارادان كەيىن رەسپۋبليكالىق دەڭگەيدە كۇيشىلەردىڭ بايقاۋىن وتكىزسەك دەگەن وي بار. سول ۇلكەن جوسپارلارىمىزدىڭ ءبىر پاراسى وسى رۋحاني بايلانىس. مۇنى سىر مەكتەبى مەن قاراتاۋ مەكتەبىنىڭ، بىلايشا ايتقاندا، قازاق تاريحىنداعى ەكى ۇلكەن ءداستۇرلى ونەر مەكتەبى ونەرپازدارىنىڭ كەزدەسۋى دەپ قابىلداۋ كەرەك، – دەدى قاراتاۋ ءداستۇرلى ونەر مەكتەبىنىڭ ديرەكتورى ءبىرجان بايتۋوۆ.

بيىل حالىق پوەزياسىنىڭ ايگىلى تۇلعاسى، ولەڭ ءسوزدىڭ ءدۇلدىلى، جىر الىبى جامبىل جابايەۆتىڭ تۋعانىنا – 175 جىل. سوندىقتان كەشتى ۇيىمداستىرۋشىلار ءىس-شارانىڭ ءبىر ماقساتى وسى ايتۋلى داتاعا وراي بالا جاسىنان دومبىرانى سەرىك ەتىپ، ەل ىشىندە اقىندىعىمەن تانىلعان، ەكى عاسىردىڭ كۋاسى بولىپ، سانالى عۇمىرىن ءان مەن جىرعا ارناپ، ۇرپاعىنا قالدىرعان جامبىلدىڭ مول مۇراسىن كورەرمەنگە ناسيحاتتاۋ بولعانىن ايتادى.