الماتىدا سوت ورىنداۋشىسىن سوققىعا جىققان ماقسوت ىسقاقوۆ جازاعا تارتىلمايتىن بولدى. بۇل تۋرالى الماتى قالالىق پوليسيا دەپارتامەنتى حابارلادى.
ايىپتالۋشى ماقسات ىسقاقوۆقا "سوت ورىنداۋشىلارىنىڭ قىزمەتىنە كەدەرگى كەلتىرۋ" بابى بويىنشا جۇرگىزىلگەن تەرگەۋدىڭ قورىتىندىسى شىققان.
– تەرگەۋ جۇمىستارى بارىسىندا سوت ورىنداۋشىسىنىڭ شابۋىلدان بۇرىن سوققىعا جىققان ازاماتتى تەۋىپ، سول ارقىلى ونى وسىنداي ارەكەتتەرگە يتەرمەلەۋ فاكتىلەرى انىقتالدى. قولدا بار بەينەجازبالاردى زەرتتەپ، قىلمىستىق ءىس ماتەريالدارىنا قوسىلدى، – دەدى الماتى قالالىق ىشكى ىستەر دەپارتامەنتى باستىعىنىڭ ورىنباسارى رۋستام ءابدىراحمانوۆ.
ەسكە سالساق، 4 قازان كۇنى الماتىدا جەكە سوت ورىنداۋشىسى ءادىل ەرمەكوۆ قىزمەت بارىسىندا سوققىعا جىعىلعان. ونى سوت شەشىمىمەن كەلىسپەگەن الماتىلىق تۇرعىن ماقسوت ىسقاقوۆ باۋىر تۇسىنان سوققان.
ارتىنشا جانجال كەزىندە زارداپ شەككەن سوت ورىنداۋشىسى ۆيدەوۇندەۋ جاريالاپ، وزىنە شابۋىل جاساعان ادامدى قاماتقىسى كەلەتىنىن ايتقان.
ال ماقسوت ىسقاقوۆ ءوز كەزەگىندە پوليسياعا جەكە سوت ورىنداۋشىسى مەن ونىڭ كومەكشىلەرىنىڭ ارەكەتتەرىنە ارىز جازىپ، ءوزىن كىنالى دەپ سانامايتىنىن ايتقان. اكىمشىلىك سوتقا جەكە سوت ورىنداۋشىسىنىڭ ارەكەتىن زاڭسىز دەپ تانۋ تۋرالى تالاپ ارىز بەرگەن.
پىكىر قالدىرۋ