ءبىلىم جانە عىلىم ءمينيسترى اسحات ايماعامبەتوۆ "عىلىم تۋرالى" زاڭعا ەنگىزىلگەن وزگەرىستەر تۋرالى تارقاتىپ ايتىپ بەردى.

ءمينيستردىڭ سوزىنشە، كەلەر جىلدان باستاپ گۋمانيتارلىق بەيىندەگى ينستيتۋتتار تۇراقتى تۇردە قارجىلاندىرىلادى. سونىمەن قوسا 1 600 عالىم بازالىق قارجىلاندىرۋ شەڭبەرىندە جالاقى الا باستايدى. 

– بۇرىن عالىمداردىڭ قاتىسۋىمەن وتەتىن ءاربىر كەزدەسۋدە عىلىمي زەرتتەۋلەردى قارجىلاندىرۋ مەرزىمىن 3 جىلدان 5 جىلعا دەيىن ۇلعايتۋ ماسەلەلەرى كوتەرىلەتىن ەدى. گۋمانيتارلىق بەيىندەگى عالىمدارىمىز (قازاق ادەبيەتى، ءتىل ءبىلىمى، قازاقستان تاريحى، ارحەولوگيا، فيلوسوفيا جانە ت.ب.) وسى باعىتتاردى قارجىلاندىرۋ ماسەلەسىنە ەرەكشە نازار اۋدارۋ قاجەت ەكەندىگىن 10 جىلدان استام ۋاقىتتان بەرى ايتىپ كەلەدى، – دەدى اسحات ايماعامبەتوۆ. 

– گۋمانيتارلىق بەيىندەگى ينستيتۋتتار تىكەلەي قارجىلاندىرۋ شەڭبەرىندە تەك گرانتتىق جوبالارعا تاۋەلدى بولماي، كەرىسىنشە ءوز باعىتتارى بويىنشا زەرتتەۋلەر جۇرگىزۋ ءۇشىن تۇراقتى قارجىلاندىرىلاتىن بولادى. سوڭعى ەكى جىلدا اتالعان كەڭەستەردىڭ جۇمىسىندا ايتارلىقتاي وڭ وزگەرىستەر ورىن الدى. ۇلتتىق عىلىمي كەڭەس شەشىمدەرىنىڭ بارىنشا نەگىزدىلىگى مەن وبەكتيۆتىلىگىن قامتاماسىز ەتۋ ءۇشىن زاڭ جۇزىندە اپەللياسيالىق كوميسسيا ەنگىزىلىپ جاتىر. كوميسسيا ۇلتتىق عىلىمي كەڭەس شەشىمدەرىنە قاتىستى عالىمداردىڭ اپەللياسيالارى مەن ادەپ كودەكسىن ساقتاۋ ماسەلەلەرىن قاراستىراتىن بولادى، – دەدى ول.