گرۋزيا ەكس-پرەزيدەنتىنىڭ جەكە دارىگەرى نيكولوز كيپشيدزە سااكاشۆيليدىڭ دەنساۋلىعى ءالسىز، جاعدايى كەز-كەلگەن ۋاقىتتا ناشارلاپ كەتۋى مۇمكىن ەكەنىن ايتتى. بۇل تۋرالى تاسس اقپارات اگەنتتىگى حابارلادى.

– بۇگىن ءبىز سىنامالاردىڭ ناتيجەلەرىن الدىق جانە كونسيليۋممەن بىرگە بارلىق جاعدايدى قاراستىردىق. ءبىر اپتا بۇرىن وتكەن كەڭەسپەن سالىستىرعاندا ناتيجەلەر ناشارلادى. ەكس-پرەزيدەنت جۇرەك سوعىسىنىڭ تەز سوعۋىنا شاعىمدانادى، ءحالى بۇرىنعىدان السىزدەۋ. جاعداي كەز كەلگەن ۋاقىتتا كۇرت ناشارلاپ كەتۋى مۇمكىن. جاعداي تۇراقسىز بولعاندىقتان، ناقتى ەشتەڭە ايتا المايمىن، – دەدى كيپشيدزە  جۋرناليستەرگە.

ەكس-پرەزيدەنت جۇما كۇنى كەزەكتى رەت دارىگەر تەكسەرۋىنەن وتەدى.

– دەنساۋلىعىن ءجيى باقىلاپ وتىرۋ ءۇشىن كەلەسى كونسيليۋمدى جۇما كۇنى وتكىزۋدى ۇيعاردىق. ءبىز قيىن كەزەڭگە اياق باسۋدامىز، ويتكەنى بۇرىنعى پرەزيدەنت ءوز سالماعىنىڭ 10 پايىزىن جوعالتتى، بۇل – وتە ءقاۋىپتى، – دەپ قوستى كيپشيدزە. 

ميحايل سااكاشۆيلي 2004-2013 جىلدار ارالىعىندا گرۋزيا پرەزيدەنتى بولدى. كەيىن وعان قاتىستى بىرنەشە قىلمىستىق ءىس قوزعالىپ، ول ەلدەن كەتۋگە ءماجبۇر بولعان. سوت ساياساتكەرگە سىرتتاي ۇكىم كەسكەن. سااكاشۆيلي وزىنە تاعىلعان ايىپتىڭ ساياسي استارى بار دەپ سانايدى.

ميحايل سااكاشۆيلي 1 قازاندا ءوز ەركىمەن گرۋزياعا كەلىپ، بىردەن ۇستالعان بولاتىن.