ميللياردەر، Tesla كومپانياسىنىڭ باس اتقارۋشى ديرەكتورى يلون ماسكتىڭ Twitter اككاۋنتىندا ءبىراز شىتىرمان وقيعالار بولدى.
2018 جىلى ماسك "Tesla-نى جەكەمەنشىككە الۋدى قاراستىرىپ جاتىرمىن" دەگەن تۆيتىنەن كەيىن وعان اقش-تىڭ باعالى قاعازدار جانە بيرجالار جونىندەگى كوميسسياسى ايىپ تاعىپ، 20 ميلليون دوللار ايىپپۇل سالعان بولاتىن.
2020 جىلدىڭ ساۋىرىندەگى لوكداۋن كەزىندە، ماسك Twitter-دە "ءدال ءقازىر امەريكانى ەركىن جىبەر" دەپ جازىپ، تاعى دا داۋ تۋدىرعان.
كەلەسى ايىندا ماسك "مەن بارلىق دەرلىك فيزيكالىق مەنشىكتەرىمدى ساتامىن. ەشقانداي ءۇي بولمايدى" دەگەن.
ەندى 62 ميلليون جازىلۋشىسى بار ماسك تاعى دا ءبىر قىزىقتى تۆيت جاريالادى.
تۆيت اعىلشىن تىلىندە "ادامزات" دەگەن سوزدەن باستالعان. ودان كەيىن جۇڭگو تىلىندەگى ەجەلگى ولەڭ جولدارى كەتەدى.
ولەڭدى ءبىزدىڭ زامانىمىزدىڭ 220-280 جىلدار ارالىعىنداعى قىتايدىڭ ءۇش مەملەكەتكە بولىنگەن كەزەڭىندە ءومىر سۇرگەن اقىن ساو چجي جازعان. دەرەكتەرگە سايكەس، ساو چجي بۇل سوزدەردى اعاسىمەن اراداعى داۋدى شەشۋ ءۇشىن داۋىستاپ ايتقان.
دەرەكتەر بويىنشا، يمپەراتور ساو پي ءىنىسى ساو ءچجيدىڭ بيلىكتى قۇلاتپاق نيەتى بار دەپ كۇدىكتەنىپ، ونىڭ ادالدىعىن انىقتاۋ ءۇشىن اقىندى شاقىرادى. يمپەراتور ساو چجي اقىننىڭ كىناسىزدىگىنە كوز جەتكىزۋ ءۇشىن ودان جەتى قادام اتتاماي تۇرىپ ولەڭ جازۋدى تالاپ ەتەدى.
"جەتى قادام ءتورت تارماق" دەگەن ولەڭ يمپەراتوردىڭ وسى سىناعىنان تۋىنداعان. سودان كەيىن يمپەراتور ەموسياسىن جەڭىپ، ىنىسىنە كۇدىگى سەيىلگەن-دى.
ولەڭنىڭ ءتورت تارماقتى نۇسقاسىنىڭ (ماسك بولىسكەن) اۋدارماسى كەلەسىدەي:
"بۇرشاق ساباعىنىڭ جالىنىندا بۇرشاقتار قۋىرىلدى،
قازاننىڭ ىشىندە بۇرشاقتار) اشۋلاندى:
"ءبىز ءبىر تامىردا وستىك -
ءبىزدى وتتا پىسىرۋگە نەگە اسىعاسىڭ؟".
(Humankind
煮豆燃豆萁
豆在釜中泣
本是同根生
相煎何太急)
بۇل جۇڭگو ادەبي شىعارماسى ادەتتە باۋىرلاستار اراسىنداعى قارىم-قاتىناستى رەتتەيتىن جانە ۇساق كەلىسپەۋشىلىكتەرگە جاۋاپ رەتىندە "بىر-بىرىنە زيان كەلتىرۋ" دەگەن يدەياعا قارسى تۇراتىن مەتافورا رەتىندە تۇسىندىرىلەدى.
ماسكتىڭ ءتۆيتى جۇڭگو مەن اقش الەۋمەتتىك جەلىسىندە قىزۋ تالقىعا ءتۇستى. ولەڭ جولدارىنا تالداۋ جاساعان، ونىڭ كىمگە باعىتتالعانىن تۇسىندىرگەن ءار ءتۇرلى تەوريالار پايدا بولدى.
الەۋمەتتىك جەلى قولدانۋشىلارى مەن الەمدىك ب ا ق ماسك ايتىپ وتىرعان "مەتافورالىق اعايىندىلار كىم بولۋى مۇمكىن؟"، "بۇكىل ادامزات؟"، "كليماتتىڭ وزگەرۋىنە قارسى كۇرەس پە؟"، "ماسك پەن عارىشقا قۇمار ميللياردەر دجەفف بەزوس پە؟"، "جۇڭگو مەن امەريكا قۇراما شتاتتارى ما؟" دەگەن سۇراقتار قويعان.
"ءبىزدىڭ باتىستىق دوستارىمىز ءۇشىن. بۇل ءۇش پاتشالىق رومانسىنداعى ولەڭ. ءبىز (وسى ولەڭ جولدارى ارقىلى) بىر-بىرىمىزبەن سوعىسپاۋ كەرەكتىگىن بەينەلەيمىز" دەپ جازادى OKEX باس ديرەكتورى دجەي حاو Twitter-دە. ول ماسكتىڭ ءتۆيتى شىعىس پەن باتىستى مەڭزەگەنىن، قاقتىعىستى بولدىرماۋ كەرەك ەكەنىن ايتتى دەپ سەنەدى.
"ول تايۆان ماسەلەسىن ايتىپ جاتىر. ونىڭ كوزقاراسى بىلىنۋدە" دەلىنگەن ماسكتىڭ Weibo جازباسىنىڭ استىنداعى تانىمال پىكىردە.
"مۇنىڭ سەبەبى دەموكراتتار بايلارعا سالىق سالعىسى كەلەدى، ونىڭ ىشىندە ماسكتىڭ 50 ميلليارد اقش دوللارى جانە بەزوستىڭ 44 ميلليارد دوللارى بار" دەپ جازادى تاعى ءبىرى.
ماسكتىڭ پوەتيكالىق تۆيتتەرىنىڭ استىنداعى كەيبىر تۇسىنىكتەمەلەردە "Shiba Inu جانە Dogecoin كريپتوۆاليۋتالارىنا سىلتەمە جاسالۋى مۇمكىن" ەكەندىگى ايتىلعان.
العاشقى كەزدە ماسك Dogecoin كريپتوۆاليۋتاسىن قولداپ، ول جۇزدەگەن ەسە قىمباتتاعان. كەيىنىرەك وعان باسەكەلەس رەتىندە Shiba Inu كريپتوۆاليۋتاسى شىعىپ، ونىڭ دا باعاسى كورنەكتى كوتەرىلدى. ءتىپتى جاقىندا Shiba Inu-دىڭ نارىقتىق قۇنى Dogecoin-نان اسىپ ءتۇستى. "بۇل ءتيىستى مونەتالاردى جاقتاۋشىلار اراسىندا شيەلەنىس تۋدىردى" دەپ حابارلادى Fortune.
ال، قىتايدىڭ "سينحۋا" مەملەكەتتىك اگەنتتىگىنە قاراستى "Reference News" باسىلىمى ماسكتىڭ جازباسىنا باسقاشا تالداۋ جاسايدى. باسىلىم ءتۆيتتى بىرىككەن ۇلتتار ۇيىمى دۇنيەجۇزىلىك ازىق-تۇلىك باعدارلاماسىنىڭ اتقارۋشى ديرەكتورىمەن قايىرىمدىلىق تۋرالى ماسكتىڭ قىزۋ پىكىر الماسۋىمەن بايلانىستىرادى.
Tesla كومپانياسى ەجەلگى جۇڭگو ولەڭى تۋرالى تۆيتكە تۇسىنىكتەمە بەرۋ سۇراۋىنا جاۋاپ بەرمەدى.
پىكىر قالدىرۋ