Facebook ەفيوپيا پرەمەر-مينيسترى ابيي احمەدتىڭ جازباسىن ءوشىرىپ تاستادى. كومپانيا بۇل ارەكەتىن "ول زورلىق-زومبىلىققا قارسى الەۋمەتتىك جەلى ساياساتىن بۇزدى" دەپ ءتۇسىندىردى.

ەفيوپيا پرەمەر-مينيسترى ازاماتتاردى قارۋ الۋعا شاقىرعان. اقپاراتقا سايكەس ول "تيگرەي حالىقتى ازات ەتۋ مايدانى"(تحام) دەپ اتالاتىن كوتەرىلىسشىلەردىڭ العا جىلجۋىنا توسقاۋىل قويۋ ءۇشىن پوست جاريالاعان.

كوتەرىلىسشىلەر سوڭعى كۇندەرى نەگىزگى قالالاردى باسىپ الىپ، ۇكىمەت كۇشتەرىنە قارسى ءبىر جىل بويى كۇرەس جۇرگىزدى.

كەيبىر اككاۋنتتاردىڭ زورلىق-زومبىلىقتى تاراتۋ ءۇشىن Facebook-تى قولدانۋى ءجيى سىنالادى. كومپانيا وسىنداي جاعدايلاردى توقتاتۋ ءۇشىن ءونىمدى جۇمىس ىستەي الماعاندىقتان ايىپتاۋلارعا تاپ بولدى.

باس كومپانياسى Meta دەپ وزگەرتىلگەن Facebook وكىلى "ءبىز ەفيوپيا پرەمەر-مينيسترىنىڭ جازباسى تۋرالى حاباردار بولدىق جانە  زورلىق-زومبىلىقتى قوزدىرۋعا، قولداۋعا قارسى ساياساتىمىزدى بۇزعانى ءۇشىن پوستتى ءوشىرىپ تاستادىق. Meta-دا (بىرەۋ) قاۋىمداستىق ستاندارتتارىن بۇزسا، جەكە تۇلعالاردىڭ نەمەسە ۇيىمداردىڭ كىم ەكەنىنە قاراماستان، جازبانى الىپ تاستايمىز" دەپ مالىمدەدى.

وتكەن ايدا Facebook كومپانياسىنىڭ ىشكى قۇجاتتارى جاپپاي جاريالاندى. وندا ەفيوپياداعى قارۋلى توپتار ەتنيكالىق ازشىلىقتارعا زورلىق-زومبىلىق جاساۋ ءۇشىن، سونداي اقپاراتتاردى تاراتۋ ءۇشىن Facebook پلاتفورماسىن پايدالانىپ جاتقانى انىقتالدى.

قازان ايىندا اقش سەناتىندا سويلەگەن فرەنسيس حاۋگەن كومپانيا اقش-تان تىس جەرلەردە ءوز قىزمەت ساياساتتارىن دۇرىس جۇرگىزبەگەندىكتەن ەفيوپيا سياقتى قاقتىعىس ايماقتارىندا "ەتنيكالىق زورلىق-زومبىلىقتى تۋدىرۋدا" دەپ مالىمدەدى.

بىرىككەن ۇلتتار ۇيىمىنىڭ مالىمەتى بويىنشا، ەفيوپياداعى قاقتىعىستاردان مىڭداعان ادام قازا تاپقان، ميلليونداعان ادام بوسقىنعا اينالىپ، جۇزدەگەن مىڭ ادام اشارشىلىق جاعدايىنا تاپ بولدى.

سوعىس وتكەن جىلدىڭ 4 قاراشاسىندا ەفيوپيانىڭ پرەمەر-مينيسترى ابي تيگرايداعى ايماقتىق كۇشتەرگە قارسى اسكەري شابۋىل جاساۋعا بۇيرىق بەرگەن كەزدە باستالدى.

تحام تەرروريستىك ۇيىم دەپ تانىلدى، ءبىراق ۇيىم وزدەرىن تيگرەيدىڭ زاڭدى ۇكىمەتى ەكەنىن ايتادى.

ايتا كەتەيىك، جاقىندا عانا Facebook ءوزىنىڭ كورپوراتيۆتىك اتاۋىن "Meta" دەپ وزگەرتتى.

كەيبىر ساراپشىلار سۋكەربەرگتىڭ بۇل قادامى نازاردى Facebook-تىڭ اينالاسىنداعى جاعىمسىز وقيعالاردان باسقا جاققا اۋدارۋ ەكەنىن ايتادى.