قازاقستاندا مۇگەدەكتىك سەبەبىنە قاراماستان I توپتاعى مۇگەدەككە كۇتىم كورسەتەتىندەرگە جاڭا جاردەماقى تولەنەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى حابارلادى.
"قازاقستاننىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭىنا سايكەس، قازاقستاندا مۇگەدەكتىك سەبەبىنە قاراماستان، I توپ مۇگەدەگىنە كۇتىم جاسايتىن ادامدارعا ەڭ تومەنگى كۇنكورىس دەڭگەيىنىڭ 1،4 مولشەرىندە (2021 جىلى – 48 023 تەڭگە) جاردەماقى ەنگىزىلدى.
مۇگەدەكتىك بويىنشا جاردەماقىنى كىمدەر الادى
I توپتاعى مۇگەدەككە كۇتىم جاسايتىن ادامدار وسى جاردەماقىنى الۋ ءۇشىن "ازاماتتارعا ارنالعان ۇكىمەت" مەملەكەتتىك كورپوراسياسىنىڭ بولىمشەلەرىنە ءوتىنىش بەرۋى كەرەك. وتىنىشپەن بىرگە مىناداي قۇجاتتار قوسا تاپسىرىلادى:
- جەكە باسىن كۋالاندىراتىن قۇجات (جەكە كۋالىك، قانداس كۋالىگى، ازاماتتىعى جوق ادامنىڭ كۋالىگى، شەتەلدىكتىڭ تۇرۋعا ىقتيارحاتى نەمەسە سيفرلىق قۇجاتتار سەرۆيسىنەن ەلەكتروندى قۇجات)؛
- I توپتاعى مۇگەدەككە قورعانشىلىق (قامقورشىلىق) بەلگىلەنگەنىن راستايتىن قۇجات (ونداي دەرەك بولعان جاعدايدا)؛
- كۇتىمگە مۇقتاج ادامنىڭ مۇگەدەكتىگى تۋرالى انىقتاما؛
- جاردەماقى بەرۋ جونىندەگى ۋاكىلەتتى ۇيىمداعى بانك شوتىنىڭ ءنومىرى تۋرالى مالىمەتتەردى راستايتىن قۇجات، سايكەستەندىرۋ ءۇشىن قاجەت؛
- پسيحيكالىق دەنساۋلىق ورتالىعىندا ەسەپتە تۇرمايتىنى تۋرالى انىقتاما.
بۇدان باسقا، كۇتىمدى جۇزەگە اسىرۋشى رەتىندە ايقىندالعان ادامنىڭ ىس-ارەكەتكە قابىلەتتىلىگى تۋرالى مالىمەتتەر جەكە باسىن كۋالاندىراتىن قۇجات بويىنشا ادىلەت مينيسترلىگىنىڭ "جەكە تۇلعالاردىڭ مەملەكەتتىك دەرەكقورى" اقپاراتتىق جۇيەسىندە تەكسەرىلەدى.
پىكىر قالدىرۋ