پرەزيدەنت قاسىم-جومارت توقايەۆ دامۋ الەۋەتى تومەن مونوقالالاردان قونىس اۋدارۋشىلار ءۇشىن جەڭىلدەتىلگەن يپوتەكا باعدارلاماسىن اشۋدى تاپسىردى. 

– "وتباسى بانكتە" مۇنداي ازاماتتار ءۇشىن جەڭىلدەتىلگەن يپوتەكا باعدارلاماسىن قاراستىرعان ءجون. باستاپقى جارنا – 10%، سىياقى مولشەرلەمەسى – 2-دەن 5%-كە دەيىن. ۇكىمەت اكىمدىكتەرمەن بىرلەسىپ اتالعان باستامانى جان-جاقتى پىسىقتاۋى قاجەت، –  دەدى توقايەۆ ەكىباستۇزدا مونوقالالاردى دامىتۋ جونىندەگى كەڭەستە.

پرەزيدەنت مەملەكەتتىك تۇرعىن ءۇي ساياساتى اياسىندا دامۋ الەۋەتى تومەن مونوقالالاردان كوشەتىن ادامدارعا جەكە ءبولىم ارناۋ كەرەكتىگىن اتاپ ءوتتى. 

– وسىلايشا ءبىز بۇل ازاماتتاردى پەرسپەكتيۆاسى بار، دامىعان، ماماندارعا مۇقتاج قالالارعا ءوز ەركىمەن قونىس اۋدارۋعا ىنتالاندىرامىز. ونەركاسىپتىك مونوقالا تۇرعىندارىنىڭ كوبى بىلىكتى، سۇرانىسقا يە جۇمىسشى جانە ينجەنەرلىك ماماندىقتاردا تاجىريبەسى بار ەكەنىن جاقسى بىلەمىز، – دەدى توقايەۆ.

ونىڭ سوزىنشە، مونوقالالاردىڭ ەكونوميكاسىن ءارتاراپتاندىرۋدا جانە شاعىن جانە ورتا بيزنەستى دامىتۋدا جاڭا ءوندىرىس ورىندارىن قۇرۋ جوبالارى ماڭىزدى ءرول اتقارادى. ۇكىمەت 20 مىڭ جۇمىس ورنىن قۇرۋمەن قۇنى 2 تريلليون تەڭگەگە 79 جوبانى ىسكە اسىرىپ جاتىر.