الماتى قالاسى كاسىپكەرلەر پالاتاسى ديرەكتورىنىڭ ورىنباسارى سالتانات لەسبايەۆا "كوك" مارتەبەسى بار قازاقستاندىقتار ساۋدا ورتالىقتارىنا جۇمىس كۇندەرى دە كىرە الماۋى مۇمكىن ەكەنىن مالىمدەدى.
– بۇگىنگى كۇنى باس سانيتارلىق دارىگەردىڭ قاۋلىسى بويىنشا "جاسىل" مارتەبەسى بار تۇلعالاردى عانا نىساندارعا كىرگىزۋ كوزدەلىپ وتىر. جاقىندا ۆاك وتىرىسىندا بۇل تاجىريبەنى جۇمىس كۇندەرى دە ساۋدا-ويىن ساۋىق ورتالىعىنىڭ جۇمىس تارتىبىنە ەنگىزۋ ۇسىنىلدى. ياعني، بۇگىنگى تاڭدا ساۋدا ويىن-ساۋىق ورتالىقتارىنا تەك "جاسىل" مارتەبەسى بار تۇلعالار عانا بارا الۋى ءۇشىن اتالعان ماسەلە تالقىلانۋدا، – دەدى سالتانات لەسبايەۆا بريفينگ بارىسىندا.
ونىڭ ايتۋىنشا. "اتامەكەن" ۇكپ ماسەلەنى تالقىلاۋعا بەلسەندى قاتىسادى.
– سوو-دا كوپتەگەن كاسىپكەرلەر جۇمىس ىستەيدى. بۇل وبەكتىلەردە اينالىمى، تابىسى تومەندەۋى مۇمكىن باسقا دا قىزمەت تۇرلەرى ورنالاسقان. سوندىقتان بۇل ماسەلە ءقازىر بەلسەندى تالقىلانىپ جاتىر جانە پىسىقتالۋدا، – دەپ ناقتىلادى ول.
لەسبايەۆا جاقىندا "اتامەكەن" ۇكپ باسقارما ءتوراعاسىنىڭ ورىنباسارى ولجاس وردابايەۆتىڭ توراعالىعىمەن مۇددەلى بيزنەس سۋبەكتىلەرىن تارتا وتىرىپ، وسى ۇسىنىستى تالقىلاۋ بويىنشا جۇمىس كەڭەسى وتكەنىن اتاپ ءوتتى.
– ەندى بارلىق شىعىنداردى ەسەپتەۋ كەرەك، ولار ءوز جۇمىستارىن قالاي ۇيىمداستىرادى، بۇل كەلۋشىلەر ترافيگىنىڭ تومەندەۋىنە اسەر ەتە مە، جوق پا. وسى ماسەلەلەردىڭ بارلىعىن تالقىلاۋ قاجەت، سودان كەيىن دەنساۋلىق ساقتاۋ مينيسترلىگىندەگى ارىپتەستەرمەن بىرگە بۇل ماسەلە پىسىقتالاتىن بولادى، – دەدى لەسبايەۆا.
باس سانيتار دارىگەردىڭ قاۋلىسىنا سايكەس، سەنبى-جەكسەنبى كۇندەرى ساۋدا ورتالىقتارىنا “جاسىل" مارتەبەسى بار ادامدار عانا كىرە الادى. "جاسىل" مارتەبە ۆاكسينا سالدىرعاندارعا بەرىلەدى. "كوك" مارتەبە كوروناۆيرۋسپەن اۋىرماعاندارعا تيەسىلى.
پىكىر قالدىرۋ