شىمكەنت اكىمى م.ايتەنوۆ ەڭبەكشى اۋدانىنىڭ قىس مەزگىلىنە دايىندىق جۇمىستارىن پىسىقتادى.

قىستا ەڭبەكشى اۋدانى اۋماعىن قاردان تازالاۋ جۇمىستارىن ءتورت مەردىگەر («لتد تۇرمىس» ج ش س، «بايتەرەك ل.ب.» ج ش س، «يۋگدورسەرۆيس» ج ش س، «نۇرتاۋسەرۆيس» ج ش س) مەكەمە جۇرگىزەدى.

جالپى اۋدان اۋماعىنداعى ورتالىق كوشەلەردىڭ ۇزىندىعى 191 شاقىرىم كەلەتىن 76 كوشەنى قاردان تازارتۋ جۇمىستارى10 باعىتقا بولىنگەن. ءار باعىت سىزباسى دايىندالىپ، كوشەلەردىڭ ۇزىندىعى ەسەپتەلگەن. كەزەكشى بريگادالار جۇمىسقا دايىن.

210 ادامدىق جۇمىسشى توپ، 60 ارنايى قار كۇرەۋ، قۇم سەبۋ جانە اياقجولداردى تازالاۋ تەحنيكا بەلگىلەنگەن. ونىڭ ىشىندە 46 تەحنيكا قار تازالاۋ جانە ينەرتتى ماتەريالداردى سەبۋگە ارنالعان بولسا، 4 تەحنيكا تيەگىش (پوگرۋزچيك)، 10 تەحنيكا ساموسۆال بار.

-قىس مەزگىلىندە مەكتەپتەرگە باراتىن اياقجولدار ءارى جارىق، ءارى ءبىرىنشى كەزەكتە قاردان تازارۋى قاجەت. بۇل جونىندە ءتيىستى تاپسىرمالار بەرىلدى. ورىندالۋى ءوز باقىلاۋىمدا بولادى - دەدى قالا باسشىسى.