يتاليا سوتى سوڭعى ونجىلدىقتارداعى ەڭ ءىرى مافيا سوتىنىڭ ءبىرىنشى كەزەڭىندە "ندرانگەتا" دەگەن ءىرى مافيالىق توپتىڭ 70 مۇشەسىنە ۇكىم شىعاردى.

ايىپتالۋشىلارعا كىسى ولتىرۋگە وقتالۋ جانە بوپسالاۋ سياقتى ايىپتار تاعىلدى.

الداعى ەكى جىلدا 355 مافيا جانە جەمقور شەنەۋنىك يتاليانىڭ ەڭ باي جانە ەڭ كۇشتى ۇيىمداسقان قىلمىستىق توبىنا قاتىسى بار دەگەن ايىپپەن سوت الدىندا جاۋاپ بەرەدى.

پروسەسكە جۇزدەگەن ادۆوكات پەن مىڭعا جۋىق كۋاگەر تارتىلعان.

سوت پروسەستەرى لامەزيا تەرمە قالاسىنداعى ارنايى وزگەرتىلگەن سوت زالىندا جابىق ەسىك جاعدايىندا ءوتتى.

سۋديالار ايىپتالعانداردىڭ التاۋىن 20 جىلعا باس بوستاندىعىنان ايىردى. 

"ندرانگەتا" شامامەن 150 وتباسىنان تۇراتىن كەڭ تارالعان قىلمىستىق جەلى.

ۇزاققا سوزىلعان ايىپتاۋ پاراعىندا ەسىرتكى، كىسى ءولتىرۋ، ادام ولتىرۋگە وقتالۋ، بوپسالاۋ، نەسيە الۋ، قىزمەتتىك قۇپيانى جاريا ەتۋ جانە قىزمەتتىك وكىلەتتىگىن اسىرا پايدالانۋ بويىنشا ايىپتار بار.

تەرگەۋگە پروكۋرور نيكولا گراتتەري جەتەكشىلىك ەتكەن. ول يتاليانىڭ مافياعا قارسى ەڭ قۇرمەتتى باس پروكۋرورلارىنىڭ ءبىرى. گراتتەري ونداعان جىلدارىن يتاليالىق قىلمىستىق توپتارمەن كۇرەسۋگە جۇمساپ، سونىڭ سالدارىنان 30 جىلدان استام پوليسيانىڭ قورعاۋىندا ءومىر سۇرگەن.

گراتتەري وسى جىلدىڭ باسىندا حالىقتى الاڭداتقان "ندرانگەتانى" جويۋعا ۋادە بەرىپ، جۋرناليستەرگە ۇكىمنىڭ "وتە جاقسى وتكەنىن" ايتقان.

"ندرانگەتا" كەڭ اۋقىمدى زاڭسىز ارەكەتتەرمەن اينالىسادى. توپ كوكاين ساۋداسىنا ماماندانعان ءارى ەۋروپاداعى ساۋدانىڭ 80%-عا جۋىعىن باقىلايدى دەپ سانالادى.