Twitter-دەگى ساۋالنامادا داۋىس بەرۋشىلەر يلون ماسكتى سالىق تولەۋ ءۇشىن Tesla-داعى ۇلەسىنىڭ 10 پايىزىن ساتۋعا شاقىردى.

ماسك سەنبىدە باستاعان ساۋالناماعا ءۇش جارىم ميلليوننان استام Twitter پايدالانۋشىسى داۋىس بەردى، شامامەن ولاردىڭ 58%-ى اكسيانى ساتۋدى قولدادى.

ول ساۋالناما ارقىلى ءوز يەلىگىندەگى 21 ميلليارد دوللارعا جۋىق اكسيانى ساتۋ نەمەسە ساتپاۋ شەشىمىن شىعارماق.

ماسك اقش دەموكراتتارى ۇسىنعان "ميللياردەرلەرگە سالىناتىن سالىققا" جاۋاپ رەتىندە وسىلاي ىستەپ وتىر.

ءبىراق الەمدەگى ەڭ باي ادامداردىڭ ءبىرى ماسك ءوز ۇلەسىن قالاي جانە قاشان ساتاتىنى تۋرالى ءالى اشىق تۇردە تۇسىنىكتەمە بەرگەن جوق.

ەگەر ماسك اكسياسىن ساتاتىن بولسا، ۇلكەن سالىق شوتىنا ءتۇسۋى مۇمكىن.

ءىرى اكسيالاردى يەلىكتەن شىعارۋ كەزىندە كەيبىر باسشىلار ينسايدەرلىك ساۋداعا قاتىستى ايىپتاۋلاردى بولدىرماۋ ءۇشىن ساتۋدى ۇزاق ۋاقىت بويى تاراتىپ، "سوقىر" دەپ اتالاتىن ساتۋ باعدارلامالارىن پايدالانادى.

ماسك تۆيتتەرىندە ءوزىنىڭ ەشبىر كومپانياسىنان جالاقى نەمەسە بونۋس الماعانىن ايتتى، ياعني ونىڭ تابىس سالىعىن تولەيتىندەي تابىسى جوق.

ءبىراق ول وتەماقى پاكەتى ارقىلى ميللياردتاعان دوللار تاپتى. وتەماقى پاكەتى كومپانيا ونىمدىلىك ماقساتتارىنا جەتكەندە جانە ونىڭ اكسيالارى بەلگىلى ءبىر باعاعا جەتكەندە اكسيالاردىڭ ۇلكەن كولەمىن پايدالانۋعا مۇمكىندىك بەرەدى.

اقش سەناتىنداعى دەموكراتيالىق پارتيا ۇسىنعان جوسپارلارعا سايكەس، ميللياردەرلەر اكسيالارىنىڭ باعاسى كوتەرىلگەن كەزدە، ءتىپتى ولار اكسيالارىنىڭ ەشقايسىسىن ساتپاسا دا، "ىسكە الىنباعان تابىستارعا" سالىق سالىنۋى مۇمكىن.

اكتيۆتەردىڭ ساتىلعان-ساتىلماعانىنا قاراماستان، قۇن وسىمىنە سالىناتىن سالىق اقش-تاعى 700-گە جۋىق ميللياردەرگە اسەر ەتۋى مۇمكىن دەپ سانالادى. سىنشىلار اكتيۆتەردىڭ قۇنى ءارقاشان كوتەرىلە بەرمەيتىنىن اتاپ ءوتتى.

ال، ماسكتىڭ Twitter-دەگى ساۋالناماسى قارجى الەمىندە قورقىنىش تۋدىردى.

اقش بەركلي ەكونوميسى گابريەل زۋكمان Twitter-دە "الەمدەگى ەڭ باي ادامنىڭ سالىق تولەۋى Twitter ساۋالناماسىنا تاۋەلدى ەمەس كۇندى اسىعا كۇتەمىز" دەپ جازدى.

ۆەنچۋرلىق ينۆەستور چامات پاليحاپيتيا "ءبىز Twitter-دەگى ساۋالناماعا قاتىسقان ادامداردىڭ 25 ميلليارد دوللارلىق مونەتا اينالىمىنىڭ ناتيجەسىن شەشەتىنىنە كۋا بولىپ وتىرمىز" دەپ جازدى.

63 ميلليونعا جۋىق جازىلۋشىسى بار ماسك Twitter جەلىسىندەگى ەڭ تانىمال بيزنەس كوشباسشىلاردىڭ ءبىرى.

ول پلاتفورمانى ءوزى يەلەنەتىن Tesla، SpaceX جانە Neuralink كومپانيالارىنىڭ جاڭالىقتارىن ءبولىسۋ ءۇشىن ۇنەمى پايدالانادى.

ءبىراق ماسكتىڭ كەيبىر جازبالارى بۇعان دەيىن داۋ تۋدىرعان. ءتىپتى ول سوتتا جاۋاپ بەرىپ، ونداعان ميلليون دوللار ايىپپۇل تولەگەن.