شىمكەنت قالاسىنىڭ اباي اۋدانىندا مۇلىك يەلەرىنىڭ بىرلەستىگى (ميب) جانە جاي سەرىكتەستىك (جس) قۇرۋ بويىنشا ءتيىستى جۇمىستار اتقارىلۋدا. اۋداندا 453 كوپقاباتتى تۇرعىن ءۇي بار. ونىڭ 374ء-ى ادىلەت باسقارماسىندا تىركەلگەن كوندومينيۋم نىسانى سانالادى.

بۇگىنگى تاڭعا دەيىن اۋدان اكىمشىلىگىنىڭ ۇيىمداستىرۋىمەن ميب جانە جس قۇرۋدىڭ تيىمدىلىگىن ءتۇسىندىرۋ بويىنشا تۇرعىندارمەن 574 جينالىس ۇيىمداستىرىلدى. بۇگىندە 402 كوپقاباتتى تۇرعىن ءۇيدىڭ كەلىسىم حاتتاماسى جاسالىپ، تۇرعىن ءۇي كولەمىنە شاققاندا 93،6 % جەتتى. ونىڭ ىشىندە، 317 كوپقاباتتى تۇرعىن ۇيدە جاي سەرىكتەستىك، 58-ىندە مۇلىك يەلەرىنىڭ بىرلەستىگى قۇرىلىپ، قالالىق ادىلەت دەپارتامەنتىندە تىركەلدى. وتكەن اپتادا اۋدانداعى پاتەر يەلەرىمەن 21 جينالىس وتكىزىلىپ، 12 ءۇي جس باسقارۋىنا ءوتتى. ءتيىستى حاتتامالار ءتۇزىلدى.

ەڭبەكشى اۋدانىنا كەلسەك، 630 كوپقاباتتى تۇرعىن ءۇيدىڭ 16-سى ميب، 403ء-ى جس بويىنشا كەلىسىمدەرى الىنىپ، 42 باس تارتۋ حاتتامالارى جيناقتالدى. سونىمەن قاتار، جالپى 520 ۇيگە ءتۇسىندىرۋ جۇمىستارى جۇرگىزىلدى. بيىلعى جىلدىڭ 21 قازانى مەن 11 قاراشاسى ارالىعىندا ەڭبەكشى اۋدانى اكىمى اپپاراتى ماماندارىنىڭ تاراپىنان 85 كوپقاباتتى تۇرعىن ۇيگە جاڭا باسقارۋ جۇيەسىنىڭ تيىمدىلىگى ءتۇسىندىرىلىپ، قول جيناۋ ءۇشىن تۇرعىندارعا حاتتامالار بەرىلدى.

قازىرگى تاڭدا، قاراتاۋ اۋدانى اۋماعىندا ميب جانە ءجس-نى ءتۇسىندىرۋ بويىنشا تۇرعىندارمەن 91 كەزدەسۋ، 20 ونلاين جينالىس ۇيىمداستىرىلدى. اۋدان بويىنشا 10 ميب جانە 297 جس قۇرىلدى. سونىمەن قاتار، تۇسىندىرمە جۇمىستارى ناتيجەسىندە قالعان كوپقاباتتى ۇيلەردەن حاتتامالار جينالۋدا.

بۇگىنگى تاڭعا دەيىن ءال-فارابي اۋدانى اكىمشىلىگىنىڭ ۇيىمداستىرۋىمەن كوپقاباتتى ۇيلەردە باسقارۋدىڭ جاڭا نىسانىنا كوشۋ بويىنشا تۇرعىندارمەن 521 جينالىس وتكىزىلدى. سونىڭ ارقاسىندا 53 كوپقاباتتى تۇرعىن ءۇي ميب-كە كوشىپ، قالالىق ادىلەت دەپارتامەنتىندە تىركەۋگە الىندى. سونداي-اق، 295 تۇرعىن ءۇي جاي سەرىكتەستىككە بىرىكتى. قوسىمشا مۇلىك يەلەرىنىڭ بىرلەستىگىن قۇرۋ بويىنشا 33 كوپقاباتتى تۇرعىن ءۇيدىڭ كەلىسىم حاتتاماسى جيناقتالۋدا.

ءا.نۇرجىگىت ۇلى