اقش مەملەكەتتىك حاتشىسى انتوني بلينكەن مەن فرانسيا سىرتقى ىستەر ءمينيسترى جان-يۆ لە دريان رەسەي ارمياسىنىڭ ۋكراينا شەكاراسىنداعى ارەكەتىنە قاتىستى سويلەستى.
"ەكى باس ديپلومات رەسەيدىڭ ۋكراينا ماڭىنداعى اسكەري ارەكەتتەرى تۋرالى تالقىلادى، سونىمەن قاتار ۋكراينانىڭ ەگەمەندىگى مەن اۋماقتىق تۇتاستىعى تۋرالى سويلەستى" دەدى اقش مەملەكەتتىك دەپارتامەنتىنىڭ باسپا ءسوز حاتشىسى نەد پرايس.
ورىس اسكەرىنىڭ ۋكراينا شەكاراسىنا جاقىنداعانىنا بايلانىستى اقش پەن ەۋرووداق دابىل قاعۋدا.
ال گەرمانيالىق DW باسىلىمى "رەسەي ارمياسىنىڭ قوزعالىسى ىقتيمال شابۋىل ءقاۋپىن تۋدىردى" دەپ جازادى.
بۇان دەيىن ۋكراينا پرەزيدەنتى ۆلاديمير زەلەنسكيي شەكارالىق ايماقتا 100 مىڭعا جۋىق رەسەيلىك سارباز بار ەكەنىن مالىمدەگەن. وسى اپتانىڭ باسىندا اقش پرەزيدەنتى دجو بايدەن مەن ەۋروكوميسسيا ءتوراعاسى ۋرسۋلا فون دەر لەيەن رەسەيدىڭ ۋكراينا ماڭىنداعى اسكەري كۇشتەرىن ارتتىرۋ ماسەلەسىن تالقىلاعان. كەيىنىرەك لەيەن ەو شەنەۋنىكتەرى ۋكراينانىڭ اۋماقتىق تۇتاستىعىن تولىق قولدايتىنىن ايتتى.
نازاردى اۋدارۋ تەحنيكاسى
رەسەيدىڭ ۋكراينا شەكاراسىنا اسكەر جىبەرۋى مەن بەلارۋس- ەۋرووداق شەكاراسىنداعى ميگرانتتاردىڭ جينالۋى ءبىر ۋاقىتتا بولىپ جاتىر. باتىس ميگرانتتار داعدارىسىنا رەسەيدى كىنالايدى. جەكسەنبى كۇنى اقش "بەلارۋستىڭ شەكاراعا ميگرانتتاردى جىبەرۋى قاۋىپسىزدىككە قاتەر توندىرەدى، جىككە ءبولىنۋ تۋعىزادى" دەپ مالىمدەدى. اقش تاراپى "بەلارۋستىڭ ارەكەتى رەسەيدىڭ ۋكراينامەن شەكاراداعى اسكەري قوزعالىسىنان نازاردى ءبولۋدى ماقسات ەتەدى" دەپ مالىمدەگەن.
پىكىر قالدىرۋ